जनदर्शन म किसान मन ह करिन शिकायत, केमिकल प्लांट ले निकलत जहरीला पानी के

रायपुर,  09 अगस्त 2024। मुख्यमंत्री जनदर्शन म आज बलौदा बाजार जिला के ग्राम डोंगरिया ले किसान अपन आवेदन लेके पहुंचे रहिन। किसान मन ह बताइन के उंखर फसल अपोलो कंपनी के प्रदूषित पानी ले खराब होवत हे। उमन कहिन कि खरीफ के फसल कंपनी के दूषित केमिकल के सेती खराब हो गए हे। फेर रबी के फसल घलोक दूषित केमिकल के सेती खराब हो गए हे। ए संबंध म कंपनी के अधिकारी मन ल कई पइत मौखिक आग्रह करे गए हे फेर ए कंपनी ह कोनो कार्रवाई नइ करत हे। ए बात म मुख्यमंत्री ह कलेक्टर बलौदाबाजार ल तुरंत कार्रवाई करके किसान मन ल राहत देवाए के निर्देश दीन। उमन किसान मन ल आश्वस्त करिन के जिला प्रशासन ह अविलंब ए संबंध म कार्रवाई करही।