बाढि़स रोजगार के अवसर आर्थिक रूप ले मजबूत होवत हें युवा
दंतेवाड़ा, जिला म मनखे मन ल रोजगारोन्मुखी अवसर प्रदान करे बर जिला के सबो विकासखंड स्तर म पूना माड़ाकाल सेल के गठन करे गए हे। ये सेल के तहत जेन स्थानीय निवासी स्वरोजगार करना चाहत हें, अइसे इच्छुक हितग्राही आवेदन करके रोजगार प्राप्त कर सकत हें। जिला मे पूना माड़ाकाल सेल के तहत स्वरोजगार अऊ रोजगार के अनगिनत अवसर प्रदान करे जात हे। आज के समय म स्वरोजगार बेरोजगारी दूर करे के अति उत्तम विकल्प हे जेखर से जिला के उन्नति घलोक होवत हे। ग्रामीण क्षेत्र मन म आम नागरिक मन के सामाजिक आर्थिक दशा ल सुधारे बर विशेष रूप ले काम करे जात हे। अइसनहे जिला के जम्मो विकासखण्ड म गठित पूना माड़ाकाल सेल के तहत बेरोजगार मन ल सतत आजीविका उपलब्ध कराए जात हे। जेखर से ओ मन सामाजिक विकास म अपन सक्रिय भागीदारी सुनिश्चित करके आर्थिक सशक्तीकरण ल बढ़ावा देवत हें। अब तक पूना माड़ाकाल सेल के तहत 3180 प्राप्त आवेदन मन म ले 941 आवेदन मन के निराकरण करे जा चुके हे। 2239 आवेदन म जरूरी कार्यवाही करे जात हे। पात्र हितग्राही मन ल उंखर मांग मुताबिक काम जइसे मछली पालन बर बीज प्रदाय, सब्जी बीज प्रदाय, डबरी निर्माण, जमीन समतलीकरण, कुआं निर्माण, तालाब निर्माण, तार जाली, बोर खनन, बाड़ी विकास योजना तहत बोर खनन, सोलर पंप, सिलाई मशीन, स्वरोजगार बर ऋण प्रदाय, सब्जी दुकान, किराना दुकान, मुर्गी पालन, पशु शेड निर्माण देहे जात हे। पूना माड़ाकाल सेल के माध्यम ले नक्सल पीड़ित परिवार मन ल घलोक आजीविका के साधन उपलब्ध कराए जात हे। पीड़ित मन बर अइसनहे 33 योजना के चिन्हारी करे गए हे उमन ल राशन कार्ड, आधार कार्ड, आयुष्मान कार्ड, ई-श्रम कार्ड आदि ले लाभान्वित कराए जात हे। पूना माड़ाकाल सेल म मुख्यतः नलकूप खनन, तार फेंसिंग, बोर खनन, प्रिंकलर, सोलर पंप, बिजली कनेक्शन, बकरी पालन, पशु शेड, सूअर पालन, मुर्गी पालन, जमीन मरम्मत, जमीन समतलीकरण, आदि के आवेदन आए हे। जेकर निराकरण सेल के माध्यम ले करे जात हे। रोजगार के शुरुआत करे बर मनखे मन बर उंखर आर्थिक रूप ले मजबूत नइ होना एक बड़का बाधा बने रहिथे, जेखर चलते ओ मन अपन सपना ल साकार नइ कर पात रहिन। अब जिला प्रशासन कोति ले जिला म पूना माड़ाकाल सेल के स्थापना के बाद उंकर सपना साकार होए लगे हे। जेखर से इच्छुक हितग्राही मन जेन रोजगार, स्वरोजगार ले जुड़ना चाहत हें ओ मन ल उंखर पसंद के काम देके उंखर आर्थिक स्थिति म सुधार लाय के प्रयास करे जात हे। ये सेल के तहत मनखे अपन रुचि के हिसाब ले स्वरोजगार ले जुड़ के आन मनखे मन ल प्रोत्साहित करत हें। जिला प्रशासन के ये नेक पहल ले रोजगार सृजन ल बढ़ावा मिलत हे। पूना माड़ाकाल सेल के तहत जिला म हर क्षेत्र मन म मनखे मन ल रोजगार देके उंखर आर्थिक सुदृढ़ीकरण बर अथक प्रयास करे जात हे।
बदलत दन्तेवाड़ाः पूना माड़ाकाल सेल ह करिस सपना ल साकार
