जशपुर, मुख्यमंत्री श्री विष्णु देव साय के बढ़िया अगुवाई म प्रदेश के महिला मन अलग-अलग योजना मन ले जुड़ के आत्मनिर्भर बने के दिसा म आगू बढ़त हें। राज्य सरकार के बड़े योजना ‘छत्तीसगढ़ राज्य ग्रामीण आजीविका मिशन’ (बिहान) के माधयम ले गाँव के महिला मन के जिनगी म बने बदलाव देखे बर मिलत हे। जशपुर जिला के दुलदुला विकासखंड के ग्राम सिमड़ा के श्रीमती पूनम देवी घलो ए बदलाव के एक ठन प्रेरक उदाहरण बनके आगू आए हे।
श्रीमती पूनम देवी, जो ‘गणेश महिला स्व-सहायता समूह’ के सदस्य आय, आज ‘लखपति दीदी’ के रूप म जाने जाथे। कभू थोरे कन संसाधन म घर-परिवार के जिम्मेदारी म लगे रहइया पूनम देवी ह स्व-सहायता समूह ले जुड़ के अपन जिनगी के दिसा ला बदल दिस।
पूनम देवी ह बताथे के पहिली ओहा घर-गिरिस्ती के काम-काज तक ही सिमटे रहिस अउ परिवार के जरूरत ला पूरा करे बर मजूरी के सहारा लेहे ला परत रहिस। आर्थिक स्थिति ह सामान्य रहिस, जेखर से परिवार के जरूरत ला पूरा करना मुस्किल हो जावत रहिस। ओही बखत ओहा गणेश महिला सव-सहायता समूह ले जुड़े के फैसला लिस। समूह ले जुड़े के बाद ओला बचत, करजा सुबिधा अउ स्व-रोजगार के कतको मउका मन के जानकारी मिलिस।
समूह के आन महिला मन ला मछरी पालन, बकरी पालन अउ आन काम मन ले जुड़ के कमावत देख के ओला घलो प्रेरणा मिलिस। बछर 2025 के मार्च महीना म ओहा मुद्रा योजना के तहत 1 लाख रूपया के करजा लिस। ए रासि के उपयोग ओहा अपन छोट कन किराना दुकान ला बढ़ाय म करिस।
किराना दुकान ला बने व्यवस्थित अउ बड़े करे के बाद ओखर बियापार म धीरे-धीरे बाढ़ होय ला धरिस। अभी के बखत म ओखर दुकान ले हर महीना लगभग 30 ले 35 हजार रूपया तक के बिक्री हो जाथे। ए आय ले ओहा अपन परिवार के पालन-पोषण करे के संगे-संग लइका मन के पढ़ई-लिखई घलो बने ढंग ले कर पावत हे।
पूनम देवी के कहना हे कि स्व-सहायता समूह ले जुड़े के बाद ओखर जिनगी म आत्मविश्वास अउ आर्थिक थिरता दूनों आए हे। आज ओहा न सिर्फ अपन परिवार बर सहारा बने हे, बल्कि गाँव के आन महिला मन बर घलो प्रेरणा बन गे हे।
ग्रामीण आजीविका मिशन के माधयम ले जिला म महिला मन ला स्व-रोजगार ले जोड़े अउ ओमन ला आर्थिक रूप ले मजबूत बनाये बर सरलग उदीम करे जात हे।
स्व-सहायता समूह ले जुड़ के पूनम देवी बनिस आतमनिर्भर, अब ‘लखपति दीदी’ के रूप म बनावत हे नवा पहिचान
