मुख्यमंत्री के पहल म पूनम ल मिलीस पुस्तक अऊ नवा टेबलेट
रायपुर, मुख्यमंत्री श्री विष्णु देव साय के पहल म बाढ़ ले प्रभावित दंतेवाड़ा के पूनम पटेल के प्रशासनिक अधिकारी बने के तैयारी आगू घलोक निर्बाध जारी रइही। पूनम पटेल, दंतेवाड़ा जइसे नक्सल प्रभावित इलाका म रहि के पाछू तीन बछर ले यूपीएससी के तैयारी करत हे। हाले म दंतेवाड़ा म आए बाढ़ ले प्रभावित होए के सेती पूनम के पूरा परिवार राहत शिविर म हे। आज मुख्यमंत्री श्री विष्णु देव साय ह पूनम ले मुलाकात करके ओखर हाल-चाल जानिन। मुख्यमंत्री के पहल म प्रतियोगी परीक्षा के तैयारी बर पूनम ल जरूरी पुस्तक अऊ एक नवा टेबलेट उपलब्ध कराए गीस। अब पूनम के यूपीएससी तैयारी म कोनो प्रकार के बाधा नइ आवय।
दंतेवाड़ा जिला के चूड़ीटिकरा पारा वार्ड के रहवइया पूनम पटेल पाछू तीन बछर ले यूपीएससी परीक्षा के तैयारी करत हे। हाले म आए बाढ़ म ओखर घर क्षतिग्रस्त हो गीस अऊ घर के जम्मो सामान बोहा गे। पूनम ह बताइस के बाढ़ के पानी म वोखर सबो पुस्तक बोहा गे अऊ टेबलेट घलोक खराब हो गे। पूनम ह कहिस के वोखर पिता श्री संतोष पटेल किराना दुकान चलाके परिवार के पालन-पोषण करत हे अऊ ओखरे आमदनी ले बड़ मुश्किल ले एक-एक पइसा जोड़के यूपीएससी के पढ़ाई बर टेबलेट बिसाए रहेंव। बाढ़ के पानी म पुस्तक अऊ टेबलेट खराब हो जाय ले पूनम आगू के तैयारी ल लेके वो ह अड़बड़ चिंतित रहिस।
मुख्यमंत्री श्री विष्णु देव साय के निर्देश म जिला प्रशासन कोति ले पूनम ल नवा टेबलेट अऊ प्रतियोगी परीक्षा मन के जरूरी पुस्तक उपलब्ध कराए गीस। ए सहायता ले पूनम ल बड़ राहत मिले हे। अब पूनम के प्रशासनिक अधिकारी बने के रद्दा म बाढ़ घलोक बाधा नइ डाल पावय।
पूरा म बोहाईस पुस्तक, टेबलेट घलोक होइस खराब, फेर नइ रुकय पूनम के प्रतियोगी परीक्षा के तैयारी
