छत्तीसगढ़ ल मिलीस पोषक अनाज अवार्ड 2022

रायपुर, छत्तीसगढ़ ल आज राष्ट्रीय स्तर म एक अऊ पुरस्कार ले नवाजे गीस हे। हैदराबाद म भारत सरकार के आईआईएमआर कोति ले आयोजित पोषक अनाज अवार्ड 2022 म तेलंगाना के कृषि मंत्री श्री एस. निरंजन रेड्डी ह मिलेट ल बढ़ावा देहे बर छत्तीसगढ़ ल सर्वश्रेष्ठ उदीयमान राज्य के रूप म पुरस्कृत अऊ सम्मानित करिस। छत्तीसगढ़ ले ये पुरस्कार राज्य लघु वनोपज संघ के विशेष प्रबंध संचालक श्री एस.एस. बजाज ह प्राप्त करिन। समारोह म छत्तीसगढ़ सरकार के किसान हितैषी नीति अऊ राज्य म कोदो, कुटकी अऊ रागी के खेती ल बढ़ावा देहे के उदीम मन ल घलोक सराहे गीस। मुख्यमंत्री श्री भूपेश बघेल ह छत्तीसगढ़ ल राष्ट्रीय स्तर म पुरस्कार अऊ सम्मान मिले म प्रसन्नता जताए हें अऊ राज्य के कोदो, कुटकी, रागी (मिलेट) उत्पादक कृषक मन, मिलेट मिशन ले जुड़े अधिकारी, कृषि विभाग के मैदानी अमला ल बधाई देहे हें।