बिलासपुर, छत्तीसगढ़ सरकार के उद्यानिकी विभाग के पोषण बाड़ी योजना ले कई परिवार मन के बाड़ी लहलहावत हे। एखर से ऊंखर दैनिक जरूरत बर सब्जी आसानी ले मिल जात हे। सब्जी बेचके घर के कुछ जरूरत घलोक पूरा हो जात हे। बिलासपुर जिला के तखतपुर विकासखंड के ग्राम पंचायत बेलपान के संतोष मरावी अऊ सुहाग दास मानिकपुरी अपन बाड़ी म उद्यानिकी विभाग के मदद ले सब्जी लगावत हें। संतोष मरावी ह बताइस के अपन बाड़ी म वो ह भुटटा, सेमी, भिन्डी अऊ लौकी लगाए हे। उद्यानिकी विभाग के पोषण बाड़ी योजना के अंतर्गत ओ ल कई प्रकार के सब्जी किट निःशुल्क प्रदाय करे गए हे। अइसनहे श्री सुहागदास मानिकपुरी ह अपन बाड़ी म भिन्डी, तोरई, लौकी अऊ लाल भाझी उद्यानिकी विभाग कोति ले प्रदान करे गए सहायता ले लगाए हे। ए साग-भागी मन ले ऊंखर घर म उपयोग बर सब्जी के दैनिक जरूरत तो पूरा होतेच हे। एखर अलावा जादा उत्पादन होए म ओ मन ए ल साप्ताहिक बाजार म बेच घलोक देवत हें जेखर से परिवार के कुछ खरचा घलोक निकल जात हे।
पोषण बाड़ी योजना ले आइस खुशहाली
