लइका मन बर कोदो ले बने केक
शासकीय दूधाधारी बजरंग महिला स्नातकोत्तर महाविद्यालय के छात्रा मन ह निकालिन पोषण जागरूकता रैली
रायपुर, पूरा देश म सितमबर महिना ल पोषण महिना के रूप म मनाए जात हे। ये बेरा म आम मनखे मन ल पोषण के संबंध म जागरूक करे बर कई ठन आयोजन होवत हे। इही कड़ी म आज राजधानी रायपुर के शासकीय दूधाधारी बजरंग महिला स्नातकोत्तर महाविद्यालय के गृह विज्ञान विभाग कोति ले पोषण ऑन व्हील रैली निकाले गीस। रैली म विभाग के छात्रा मन ह उछाह के संग भाग लीन। उमन सही पोषण-देश रोशन अऊ सब्जी, सलाद खाओ हर बार, जइसे नारा मन के माध्यम ले मनखे मन ल जागरूक करिन। महाविद्यालय के प्राचार्य डॉ. श्रद्धा गिरोलकर ह आन व्याख्याता मन के संग रैली ल झंडा देखा के रवाना करिस। पोषण उपर आधारित नारा लगात ये रैली नेहरू नगर के आँगनबाड़ी म खतम होइस। आंगनबाड़ी म छात्रा कुमारी मुस्कान लालवानी अऊ वोखर समूह ह कार्यकर्ता मन ल ट्रेफिक सिग्नल, फ़ूड पिरामिड के माध्यम ले पोषण के जानकारी प्रदान करिस। संगेच गर्भवती, धात्री महिला मन ल फल अऊ लइका मन ल पौष्टिक खाद्य पदार्थ के संग गुड़, चना अऊ अरसी के वितरण करे गीस। लइका मन बर कोदो ले बने केक घलोक आकर्षण के केंद्र हिस। ये बेरा म छात्रा मन के संग कार्यक्रम प्रभारी डॉ. वासु वर्मा, डॉ. अभया जोगलेकर अऊ अतिथि व्याख्याता मन ह घलोक सहभागिता दीन। कार्यक्रम म आई.क्यू.ए.सी. प्रभारी डॉ. उषा किरण अग्रवाल, विभागाध्यक्ष डॉ. रश्मि मिंज, वरिष्ठ प्राध्यापक डॉ. नंदा गुरुवारा, डॉ. अनुभा झा, डॉ. शिप्रा बैनर्जी, डॉ. रेखा दीवान, डॉ. मिनी एलेक्स के संग अतिथि व्याख्याता अऊ बड़ संख्या म छात्रा मन उपस्थित रहिन। कार्यक्रम डॉ. वासु वर्मा अउ डॉ. अभया जोगलेकर के मार्गदर्शन म संपन्न होइस।
