मुर्गीपालन जइसे गतिविधि मन म आधुनिक तरीका उपर करव फोकस : एनजीजीबी के समीक्षा बैठक म जिला पंचायत सीईओ अश्विनी देवांगन ह कहिस

दुर्ग, मुर्गीपालन अऊ मत्स्यपालन जइसे गतिविधि मन ल गौठान मन म बढ़ावा देहे जात हे। इहां देखना जरूरी हे कि स्व-सहायता समूह मन ल एखर से संबंधित तकनीकी जानकारी के प्रशिक्षण घलोक नियमित देहे जाय ताकि आधुनिक तरीका उपर फोकस करके बड़े मात्रा म उत्पादक गतिविधि मन ल बढ़ावा देहे जा सकय। ये निर्देश एनजीजीबी के समीक्षा बैठक म जिला पंचायत सीईओ अश्विनी देवांगन ह दीस। उमन ये मौका म कहिन कि गौठान मन म टीकाकरण के कार्यक्रम अऊ नस्ल संवर्धन के कार्यक्रम घलोक तेजी ले बढ़ाये के जरूरत हे। पशुधन के संवर्धन जतका कारगर तरीका ले होही, ओतकेच कारगर तरीका ले गौठान मन ल स्वावलंबी होए म मदद मिलही अऊ ग्रामीण विकास के दिशा म बेहतर मौका मिलही। अइसनहे मत्स्यापालन के क्षेत्र घलोक हे। ये क्षेत्र म बहुत अकन आधुनिक तकनीक आ गए हे। जिला के प्रगतिशील मत्स्यपालक एला अपनावत हें। विभागीय अधिकारी एखर से समन्वय करके सही व्यवस्था करावयं। बाड़ी उपर फोकस करत उमन कहिन कि बाड़ी मन म उगाये जात सब्जी म घलोक फोकस करे के जरूरत हे। बीज ले लेके सिंचाई तक के सबो जरूरत बर गांव वाले मन के कइसे मदद करे जा सकत हे, ये देखव। उमन क्रेडा के अधिकारी ले चारागार अऊ बाड़ी विकास बर सौर पंप के व्यवस्था जरूरी गौठान मन म करे के निर्देश दीन। उमन कहिन कि सामुदायिक बाड़ी मन के संगेच निजी बाड़ी मन ल घलोक बढ़ावा देहे के जरूरत हे। उमन नरवा प्रोजेक्ट्स म घलोक काम मन के प्रगति के समीक्षा करिन, संगेच मनरेगा के अंतर्गत चलत कई ठन काम मन के समीक्षा करिन।