जांजगीर, 29 जुलाई 2020। स्व-व्यवसाय ले कइसे आर्थिक समृद्धि हासिल करे जा सकत हे ये साबित करे हे, जांजगीर-चाम्पा जिला के ग्राम झर्रा निवासी गिरिजानंद चन्द्रा ह। सरकार ले मिले मदद अऊ खुद के लगन ले चंद्रा के पोल्ट्री फार्म अऊ मछली पालन के व्यवसाय ले वोखर आज अच्छा-खासी आमदनी होवत हे। वोखर से प्रेरणा पाके क्षेत्र के युवा आज ये काम ल अपनावत हें।
चंद्रा के बताती ओ ह खुद के 50 डिसमिल कृषि जमीन म एक हजार चिंया पालन करके पोल्ट्री फार्म के काम चालू करिस। पशुधन विकास विभाग कोति ले मिले अनुदान योजना के लाभ लेके वो ह अपन व्यवसाय के विस्तार करिस। आज वोखर पोल्ट्री फार्म म करीबन 10 हजार चिंया के पालन होवत हे। आज ओ ल ये व्यवसाय ले तकरीबन 4 लाख रूपिया के आमदनी हर बछर होवत हे। श्री चंद्रा ह बताइस के ओ ह पोल्ट्री फार्म के अलावा ओखर से लगे 4 डिसमिल जमीन म मछली पालन घलोक करत हे। एखर से हर बछर ओ ल करीब 70 हजार रूपिया के अकतहा आमदनी होवत हे। गिरिजानंद के ये व्यवसाय ले गांव के बेरोजगार युवक मन ल फार्म म रोजगार घलोक मिलत हे।
गिरिजानन्द के ये सफलता ले प्रभावित होके आन मनखे घलोक पोल्ट्री फार्म के व्यवसाय ले जुड़त हें। गांव म मुर्गी पालन करइया परिवार के संख्या बाढ़े हे। राज्य सरकार कोति ले बेरोजगार मन ल खुद के व्यवसाय चालू करे बर आर्थिक मदद के अलावा मार्गदर्शन घलोक प्रदान करे जात हे। इही के परिणाम हे के आज के युवा आत्मनिर्भरता के राह पकड़त हें। सरकार कोति ले नाबार्ड डेयरी अउ पोल्ट्री उद्यमिता योजना के तहत पोल्ट्री फार्म, बकरी पालन, मछली पालन जइसे व्यवसाय के विस्तार बर बहुत अकन योजना संचालित करे जात हे। पात्र किसान मन ए योजना मन के लाभ लेके आर्थिक समृद्धि के रद्दा म आगू बढ़त हें। एखर से हितग्राही मन के परिवार म खुशी के माहौल हे।