विकसित भारत संकल्प यात्रा : मेरी कहानी मेरी जुबानी
राष्ट्रीय ग्रामीण आजीविका मिशन ले जुड़े बर महिला मन ल करत हे प्रेरित
धमतरी, 10 जनवरी 2024। विकसित भारत संकल्प यात्रा के तहत जिला के चारो विकासखण्ड मन म आयोजित संकल्प शिविर मन म रोजेच बड़ संख्या म मनखे पहुंचके शासन के जनकल्याणकारी योजना मन के बारे म बारिकी ले जानकारी लेवत हें अऊ ए योजना मन ले लाभान्वित हितग्राही उपस्थित गांव वाले मन ल अपन कहानी, अपन जुबानी सुनाके ओ मन ल योजना मन के लाभ लेहे बर प्रेरित घलोक करत हें।
इही कड़ी म राष्ट्रीय ग्रामीण आजीविका मिशन ले लाभान्वित हितग्राही धमतरी विकासखण्ड के ग्राम सारंगपुरी के श्रीमती नेमा सोनवानी ह घलोक अपन कहानी सुनाईस। वो ह बताइस कि ओ ह साल 2017 म राष्ट्रीय ग्रामीण आजीविका मिशन के तहत स्व सहायता समूह ले जुडि़स। एखर बाद वो ह स्वरोजगार के मंशा ले समूह ले 60 हजार रूपिया के करजा लीस अऊ मुर्गीपालन करे लगिस। नेमा के बताती घर के काम करत-करत वो ह मुर्गीपालन करिस, जेखर से वोखर आर्थिक स्थिति म सुधार आइस। मुर्गी पालन ले मिले राशि ले ओ ह करजा ल चुकाए लगिस अऊ घर के खरचा के बाद बांचे पइसा ल जमा करे लगिस। एखर बाद नेमा गांव म गठित उत्पादक समूह ले जुड़के मशरूम उत्पादन के काम घलोक करे लगिस। मुर्गीपालन अऊ मशरूम उत्पादन ले अब नेमा के आमदनी अऊ बाढ़ गे। नेमा ह बताइस के घर के आर्थिक स्थिति सुधरे के बाद लइका मन ल बने शिक्षा तो देते हे संगेच परिवार के घलोक सहयोग करत हे। नेमा खुद अपन पांव म खड़े होके आन महिला मन ल घलोक राष्ट्रीय ग्रामीण आजीविका मिशन ले जुड़े बर प्रेरित करत हे, ताकि ओखर जइसे आन महिला मन घलोक अपन पांव म खड़े होके अपन आर्थिक अऊ सामाजिक स्थिति मजबूत करयं। ए सब काम के अलावा नेमा पशु सखी के काम घलोक बखूबी निभावत हे। ओ ह गांव के पशुपालक मन ल पशु मन म होवइया बीमारी मन के जानकारी देवत हें अऊ ओखर उपचार घलोक बतावत हें।
