सुकमा, जिला मं ग्रामीण परिवार मन ला आत्मनिर्भर बनाये अउ ओमन के आय बढ़ाये खातिर पशुधन विकास विभाग कोती ले एक सुग्घर पहल करे गए हे। कलेक्टर श्री अमित कुमार के आदेस के मुताबिक अउ पशुधन विकास विभाग के उपसंचालक डॉ. संदीप इंदुरकर के अगवाई मं सुकमा विकासखंड के गाँव मन मं 50 हितग्राही मन ला मुफत म कुक्कुट इकाई बाँटे गए हे।
ए योजना के तहत गीदम नाला, नींबूपदर, मुलागुडा, भेलवापाल अउ झापरा गाँव के हितग्राही मन ला हरेक कुक्कुट इकाई मं 45 चूजा अउ 10 किलोग्राम दाना देहे गे हे। एकर उद्देस ग्रामीण परिवार मन ला कुक्कुट पालन ले जोड़के ओमन के आय मं बढ़ोतरी करना अउ थिर आजीविका के मउका देना हे।
महिला मन के भागीदारी ले बाढि़स योजना के असर
कुक्कुट इकाई मन के वितरन महिला स्व-सहायता समूह के सदस्य मन के अगुवइ मं पारदर्शी अउ व्यवस्थित ढंग ले करे गीस। कार्यक्रम मं पशु चिकित्सालय सुकमा के डॉ. टेकेश्वर, श्री भुवाल नेताम अउ मोबाइल वेटरनरी यूनिट के टीम ह सहयोग दीन।
आत्मनिर्भर गाँव कोती बढ़त हे सुकमा
पशुधन विकास विभाग के ए पहल ग्रामीण अर्थव्यवस्था ला मजबूत करे, पशुपालन ला बढ़ावा देवई अउ परिवार मन ला स्वरोजगार ले जोड़े म सफल साबित होवत हे। कुक्कुट पालन ले मिलइया उपराहा आय ले ग्रामीण परिवार मन के आर्थिक स्थिति मजबूत होही अउ ओमन ला आत्मनिर्भर बने मं मदद मिलही।
ए पहल देखाथे के शासन के योजना मन जब गाँव तक सही ढंग ले पहुँचथय, त ओ मनखे मन के जिंदगी मं सुघर बदलाव लाये के संगे-संग आजीविका के नवा मउका घलो पैदा करथय।
