- अमर स्व-सहायता समूह ह थनौद म आजीविकामूलक गतिविधि मन ल लेके करिस बड़का काम
- तीन महीना म 4 लाख रुपए के आय के भरोसा, अभी अइसनहे काम होत रहिस त हर साल 16 लाख रुपए के आय तय
दुर्ग, हजार कोस दुरिहा सफर के शुरूआत एक डांग रेंगें ले होथे। ये बात ल सार्थक करे हे थनौद के अमर स्व-सहायता समूह के महिला मन ह। शासन के पंदोली ले उमन ठोठकत 400 चियॉं ल लेके मुर्गीपालन के एक यूनिट गौठान म शुरू करे रहिन। सफलता मिले म उमन हैचरी डाल लीन। एखर से अऊ लाभ होइस अऊ अब उमन 12 हजार चियॉं के बड़का यूनिट शुरू कर देहे हें।
एक चियॉं के कीमत 5 रुपए हे। एला बढा के बेचें ले एकर लाभ करीबन 30 ले 40 रुपिया हो जाथे। 90 दिन म चियॉं बेंचाए के लईक हो जाथे ते हिसाब ले भरोसा हे कि ए तीन महीना म 4 लाख रुपिया के आय स्व-सहायता समूह के महिला मन के हो जाही। अइसनहे बढ़वार रइही त साल भर म इमन ल करीबन 16 लाख रुपिया के कमई होए के भरोसा हे।
ये बारे म जानकारी देत जिला पंचायत सीईओ श्री अश्विनी देवांगन ह बताइस कि मुख्यमंत्री श्री भूपेश बघेल के आजीविकामूलक गतिविधि मन ल बढ़ाए के बिचार हे। ये संबंध म कलेक्टर श्री पुष्पेंद्र मीणा के हुकुम म सबो गौठान मन म आजीविकामूलक गतिविधि मन ल बढ़ावा देहे के काम करे जात हे। जेन गौठान मन म ये काम सफलतापूर्वक होवत हे उहां ए मन ल अपग्रेड करे के दिशा म काम होवत हे। थनौद यूनिट ल सहायता करे म बहुत अच्छा रिस्पांस मिले हे। ए महिला मन के उदीम ल पंदोली देहे गीस अऊ आगू घलोक काम करत रहे बर कहे गीस। परिणाम अड़बड़ सुग्घर आए हे, केवल 8 सदस्य वाले ये समूह के आर्थिक लाभ लउहे बाढ़े हे।
ये संबंध म जानकारी देवत समूह के अध्यक्ष पूर्णिमा धनगर ह बताइस कि हम सब अड़बड़ खुश हन। पहिली तो हमन ठोठकत काम शुरू करेन। जिला प्रशासन के अधिकारी मन के बहुत सहयोग मिलीस। सरलग तकनीकी मार्गदर्शन मिलत रहिस अऊ आज हम अतीक बड़का शेड म काम कर पात हन।
ये संबंध म जानकारी देवत सहायक पशु चिकित्सा क्षेत्र अधिकारी श्री मोहित कामले ह बताइस कि तकनीकी मार्गदर्शन ले महिला मन बहुत अच्छा काम करत हें। हम मुर्गीपालन बर जरूरी तमाम सावधानी ओ मन ल बतावत हन। एकर उपयोग करे ले चियॉं ल सुरक्षित रखे म मदद मिलत हे।
54 गौठान म चलत हे मुर्गीपालन- ये संबंध म जानकारी देवत डॉ. डी.वी. राठिया, उपसंचालक पशु चिकित्सक सेवाएं ह बताइस कि जिला के 54 गौठान मन म मुर्गीपालन के काम होवत हे। गौठान मन के मुर्गीपालन यूनिट ल लउे अपग्रेड करे जात हे। गौठान मन म हैचरी यूनिट घलोक सुरू कर देहे गए हे। थनौद म जेन लेवल के काम होय हे ओखर से स्वसहायता समूह मन के महिला मन ह अपन आप मन ल बड़का फार्म यूनिट मन के बराबरी म खड़ा कर देहे हें अऊ अभी तो ये शुरूआतेच ये।
