रइपुर. 14 अप्रैल 2021 बुधवार । मरीज मन ल अस्पताल लाने-ले जाए बर प्रदेश म 40 ठिन अउ एम्बुलेंस के संचालन करे जाही। राज्य के दुर्गम, अति दुर्गम अउ पहुंचविहीन क्षेत्र मन म ये अतिरिक्त एम्बुलेंस संचालित करे जाही। स्वास्थ्य विभाग ह शासन कोति ले खरीदे गेहे 40 ठिन जुन्ना संचालन योग्य एम्बुलेंस मन के सेवा शुरू करे बर प्रदेश म अभी 108-संजीवनी एक्सप्रेस एम्बुलेंस सेवा संचालित करइया संस्था मन ल निर्देशित करे हवय ।
स्वास्थ्य सेवा मन के संचालक श्री नीरज बंसोड़ ह प्रदेश म एम्बुलेंस सेवा के संचालन करत संयुक्त संस्था मन के संचालक ल चिट्ठी लिखके इन एन्बुलेंस मन के संचालन सुनिश्चित करे बर कहे हवय। उन मन पाती म बताइन हे कि एम्बुलेंस के संचालन के बर संस्था ल हरेक महीना प्रति एम्बुलेंस एक लाख 33 हजार 350 रूपिया के भुगतान करे जाही । प्रदेश के दुर्गम, अति दुर्गम और पहुंचविहीन क्षेत्र मन म एम्बुलेंस सुविधा उपलब्ध करवाए बर उन मन ल दूरस्थ अंचल मन के जिला अस्पताल, सिविल अस्पताल, सामुदायिक स्वास्थ्य केंद्र अउ प्राथमिक स्वास्थ्य केंद्र मन ले संबद्ध करे गे हवय ।
