रइपुर, 09 जून 2021 बुधवार। मुख्यमंत्री दाउ भूपेश बघेल कहीन कि किसान मन के उन्कर खेत तक सुविधाजनक पहुंचे बर प्रदेश म लउहे धरसा विकास योजना प्रारंभ करे जाही । मुख्यमंत्री वृक्षारोपण योजना ल राजीव गांधी किसान न्याय योजना ले जोड़त किसान मन बर आय के नवा रद्दा खोले गे हे। मुख्यमंत्री आज अपन घरू कार्यालय म आयोजित वर्चुअल कार्यक्रम म बलौदाबाजार-भाटापारा अउ महासमुन्द जिला म लगभग 565 करोड़ रूपिया के लागत के 1430 कार्य मन के लोकार्पण अउ भूमिपूजन करीन।
मुख्यमंत्री कहीन कि लॉकडाउन के बेरा निर्माण कार्य भले थोरिक प्रभावित होइस फेर वोकर ले जादा जरूरी काम हमन पूरा ताकत के संग जारी राखेन। राज्य शासन के आनी —बानी के योजना मन के माध्यम ले गरीब, किसान, मजदूर अउ गंवइहा मन ल भूख, बेरोजगारी अउ भविष्य के चिंता ले बचाए बर पूरा ताकत के संग काम करे गे हे। पीछू बछर तको लॉकडाउन म गरीब मन ल फोकट म चांउर के बेवस्था करे गे रिहिसे। ये बछर मई —जून के फोकट म चांउर के बेवस्था पहिलीच कर देहे गे रिहिसे, अब जुलाई ले नवम्बर तक पांच महीना के चांउर फोकट म देहे जाही। सबो राशनकार्डधारी ल प्रधानमंत्री गरीब कल्याण योजना के बरोबर उपराहा चांउर तको बांटे जाही।
मुख्यमंत्री ह काली दुरूग अउ बालोद जिला म लगभग 700 करोड़ रूपिया लागत के काम मन के लोकार्पण अउ भूमिपूजन करे गइस। बलौदाबाजार जिला के ग्राम पाहांदा ले लिमाही होवत रायपुर तक पुल संघरा पक्की सड़क बनाए बर 6 करोड़ रूपिया अउ बलौदाबाजार म ठेठवार यादव समाज बर सामुदायिक भवन निर्माण बर भूमि आबंटन होेेए म भवन निर्माण बर 20 लाख के स्वीकृति देहे के आश्वासन दीन।
मुख्यमंत्री कहीन कि कोरोना काल म तको राज्य सरकार गरीब, किसान, मजदूर अउ आदिवासी मन संग सबो वर्ग के हित म काम करत रहिही। खेती-किसानी के काम मे जब-जब किसान मन ल जरूरत होही तब-तब राजीव गांधी किसान न्याय योजना के किश्त उन्कर खाता म पहुंचत रहिहीं। पीछू बछर ये योजना म चार किश्त म 19 लाख किसान मन के खाता म 5628 करोड़ राशि सोजहे भेजे गईस। अब ये योजना के सीमा ल बढ़ावत एमा धान अउ कुसियार के संगे संग राहेर, मक्का, कोदो, कुटकी, सोयाबीन, दलहन-तिलहन ल तको संघारे गे हवय।
गोबर बेचइया मन ल गोबर खरीदी के एवज म अब तक 95 करोड़ रूपिया ले अधिक राशि के भुगतान करे जा चुके हे। पीछू लॉकडाउन म मनरेगा ले रोजगार देहे म छत्तीसगढ़ देश के अव्वल राज्य रहीन हे। वनवासी क्षेत्र मन म लघु वनोपज संग्रहण के काम म छत्तीसगढ़ देश म अव्वल रहिस। कार्यक्रम के चलत मुख्यमंत्री ह दूनों जिला म गोधन न्याय योजना, मुख्यमंत्री वृक्षारोपण प्रोत्साहन योजना, स्व-सहायता समूह मन केे माइलोगन, राजीव गांधी किसान न्याय योजना के हितग्राही अउ स्वामी आत्मानंद अंग्रेजी माध्यम स्कूल के लइका मन ले गोेठ—बात करीन।