रइपुर. 3 अप्रैल 2021 शनिच्चर। छत्तीसगढ़ के त्रिस्तरीय पंचायतीराज संस्था मन अपन काम काज् मन के लोहा पूरा देश म मनवावत हावय। प्रदेश के ग्राम पंचायत, जनपद पंचायत अउ जिला पंचायत मन ल सरगल तीसरइया बछर आने —बानी श्रेणी के 11 राष्ट्रीय पुरस्कार हासिल होय हवय। भारत सरकार के पंचायती राज मंत्रालय कोति ले हालेच म घोषित राष्ट्रीय पंचायत पुरस्कार मन के विजेता मन के सूची म प्रदेश के आठ ग्राम पंचायत, दू जनपद पंचायत अउ एक ठिन जिला पंचायत शामिल हे।
मुख्यमंत्री दाउ भूपेश बघेल अउ पंचायत अउ ग्रामीण विकास मंत्री श्री टी.एस. सिंहदेव ह प्रदेश के पंचायतीराज संस्था मन के ये उपलब्धि म उन पंचायत मन ले जुड़े जम्मो जनप्रतिनिधि मन ल अउ विभागीय अधिकारी-कर्मचारी मन ल बधाई दीन हे। उन्मन कहीन कि प्रदेश के जिला पंचायत, जनपद पंचायत अउ ग्राम पंचायत मन शासन के योजना मन के मैदानी स्तर म क्रियान्वयन म महत्वपूर्ण भूमिका निभावत हावय। उल्लेखनीय हे कि बछर 2019 अउ 2020 म तको प्रदेश के आने-आने 11 ग्राम पंचायत, जनपद पंचायत अउ जिला पंचायत मन ये पुरस्कार पाए रिहिन हे।
