47 हजार ले जादा परिवार ल मिलही खुद के पक्का घर
रायगढ़, 16 दिसम्बर 2023। मेहनत-मजदूरी करके जीवन-यापन करइया कमजोर आय वर्ग के मनखे मन बर खुद के पक्का मकान बनाना एक सपना जइसे होथे। उंखर ये सपना सरकार गठन के बाद लेहे गे निर्णय के फलस्वरूप अब हकीकत म बदलइया हे। मुख्यमंत्री श्री विष्णुदेव साय ह कार्यभार संभालतेच केबिनेट के पहली मीटिंग म प्रदेश के 18 लाख ले जादा परिवार ल घर देहे के मंजूरी देहे हें। जेखर अंतर्गत जिला के करीबन 47 हजार ले जादा मनखे मन के खुद के पक्का घर के सपना जल्दीच पूरा होही।
सरकार के ये निर्णय ल लेके मनखे मन म खुशी के लहर हे। ग्राम-कोड़ातराई के श्री जागेश्वर सिंह सिदार ह बताइस कि हमार तिर अपन खुद के कच्चा मकान रहिस, जेमां हम कइ बछर ले सपरिवार रहत आत रहेन। सबले जादा बरसात के दिन म समस्या होत रहिस। जिहां छांणी ले पानी चूहय, जादा बरसात होए ले भीथिया तको ओदर जात रहिस। जेखर से हर समय एक डर बने रहय कि कहूं मकान भोसक के गिर झन जाय। तभे हमला प्रधानमंत्री गृह योजना के लाभ मिलीस अऊ हमर कच्चा मकान, पक्का मकान म बदले लगिस। फेर एक आखिरी किश्त नइ मिले के सेती मकान अधूरा परे हे, ढलाई तो हो गे हे फेर छबाई होना बाकी हे। तभे नवा मुख्यमंत्री के बने अऊ ऊंखर घोषणा के मुताबिक अब बहुत जल्दी उहू किश्त मिल जाही जेखर से हमर पक्का मकान के सपना पूरा हो जाही।
ग्राम-बोतल्दा के श्री अनिल केवट खेती-किसानी के संग ड्राईवरी के काम करथे। वो ह बताइस कि प्रधानमंत्री गृह योजना के लाभ तो मिलीस हे फेर आखिरी किश्त नइ मिले ले काम रूके रहिस। अभी हाल म तीसरा किश्त मिले ले अब मकान के काम आखरी चरण म हे। जेखर से जल्दीच अपन खुद के पक्का मकान बन जाही। श्री अनिल केवट ह प्रधानमंत्री श्री नरेन्द्र मोदी ल योजना के संचालन करे अउ मुख्यमंत्री श्री विष्णु देव साय कोति ले मनखे मन के रूके मकान के काम ल गंभीरता ले लेत किश्त के राशि जारी करे ले आज सबो मनखे मन के खुद के मकान के काम पूरा होवइया हे, जेखर खातिर वो ह धन्यवाद देवत आभार जताए हे।
47 हजार ले जादा मनखे मन के घर के सपना होही जल्दी पूरा
प्रधानमंत्री आवास योजनान्तर्गत रायगढ़ जिला के 7 विकासखण्ड म 47 हजार 889 परिवार ल खुद के पक्का मकान जल्दी मिलही। जेमां धरमजयगढ़ ले 5021, घरघोड़ा म 2103, खरसिया म 4489, लैलूंगा म 5335, पुसौर म 9458, रायगढ़ म 9073 अउ तमनार म 1010 परिवार ल आवास योजना के लाभ मिलही। ये मां पहिली के स्वीकृत 11 हजार 400 मकान घलोक सामिल हे।
