प्रधानमंत्री आवास योजना ले धनसिंह के परिवार के सपना होइस पूरा

कोंडागांव, प्रधानमंत्री आवास योजना (शहरी) ले कोंडागांव जिला के नगर पंचायत फरसगांव के वार्ड नंबर 8 के रहइया श्री धनसिंह हिडको के पक्का मकान के सपना पूरा हो गे हवय। ओह बताइस के कइ बछर तक वो ह अपन परिवार के संग एक कच्चा घर म रहत रहिस। हर मौसम अपन संग नवा पीरा लेके आवत रहिस। अखाढ़ के दिन म छानी ले पानी चूहय, कच्ची भिथिया ले नमी रिसत रहय अउ हर बछर छानी के मरम्मत म मेहनत अउ पइसा दूनों लगत रहिस। अइसन हालत म परिवार के सुरक्षा अउ लइका मन के भविष्य चिंता के बिसय बने रहय।
ओ ह बताइस के मोर घरवाली के हमेशा ले इही इच्छा रहिस के हमरो एक पक्का घर होवय, जिहां हमन सुरक्षित अउ सम्मान के संग जिनगी बिता सकन। फेर एक गरीब किसान बर पक्का मकान बनवाना सिरिफ एक सपना बरोबर रहिस। तभे वार्ड म मुनादी अउ शिविर के माध्यम ले ओ ला प्रधानमंत्री आवास योजना के जानकारी मिलिस, जेकर तहत सासन डहार ले पात्र हितग्राही मन ला पक्का मकान बनाये बर आर्थिक सहायता देहे जाथे।
धनसिंह ह जरूरी कागजात के संग आवेदन करिस अउ जम्मो प्रक्रिया ला पूरा करिस। जब मंजूरी मिलिस त ओकर घरवाली के आंखी म खुसी के आंसू आ गे। धीरे-धीरे निर्माण के काम सुरु होइस अउ कुछे बखत म ओकर सपना के पक्का घर बन के तियार हो गे। अब ओकर परिवार सुरक्षित माहौल म रहत हवय, जिहां अखाढ़ अउ मौसम के मार के कोनो डर नइ हवय।
धनसिंह ह प्रधानमंत्री श्री नरेंद्र मोदी अउ मुख्यमंत्री श्री विष्णुदेव साय के आभार जताइस अउ कहिस के प्रधानमंत्री आवास योजना कतको गरीब परिवार मन के पक्का मकान के सपना ला पूरा करत हवय।