प्रधानमंत्री आवास योजना ग्रामीण न सिरिफ जरूरतमंद मन ल पक्का मकान देवत हे, बल्कि ऊंखर सपना मन ल घलोक नवा ठउर अऊ आत्म-सम्मान देवत हे। अइसनहेच एक कहानी हे जशपुर जिला के कांसाबेल विकासखंड के ग्राम दोकड़ा निवासी 70 वर्षीय संतु चक्रेस के।
कइ बछर ले कच्चा घर म कठिन परिस्थिति मन म जीवन बितइया सियान संतु चक्रेस आज अड़बड़ खुस हे काबर के ओ ल ओखर पहला पक्का घर मिल गए हे। खास बात ये हे के ए घर के चाबी ओ ल मुख्यमंत्री श्री विष्णु देव साय के हाथ ले मिले हे। ये तब होइस जब ओ हाले म जशपुर गए रहिस।
भावुक संतु चक्रेस ह मुख्यमंत्री ल धन्यवाद देवत कहिस के “उम्मर के ए पड़ाव म जब चिंता मुक्त होके वो ह जीना चाहत हे, तब ये पक्का मकान मोर बर भगवान के आशीर्वाद ये। अब मोला अऊ मोर परिवार ल न तो बारिश ले डर हे अऊ नइ ही जहरीला जीव-जंतु मन ले। अब हमरो एक सुरक्षित अऊ मजबूत आशियाना हे।”
संतु चक्रेस ह बताइस के ओ ल प्रधानमंत्री आवास योजना के तहत पक्का मकान पास होय रहिस, जेन अब पूरा बनकर तैयार हे। ये सिरिफ एक मकान नो हे, बल्कि ऊंखर बर आत्म-सम्मान, सुरक्षा अऊ स्थायित्व के चिनहारी ये।
कइ बछर ले झोपड़ी जइसे घर म जीवन बिताए के बाद जब ओ ल अपन खुद के ठोस छत मिलीस, त वोखर चेहरा के खुशी देखे लायक रहिस।
संतु चक्रेस ल मिलीस सपना के घर, मुख्यमंत्री ले पक्का मकान के कूची पाके भावुक होइस सियान
