पीएम आवास योजना ले नारायणपुर के ग्रामीण परिवार ला मिलिस नवा सुरुक्षा अउ सम्मान
नारायणपुर, मौसम के मार सहत जर्जर कच्चा मकान के छानी, पानी गिरै म चूहै अउ हर बखत बने रहया अनहोनी के डर— ए हा नारायणपुर जिला के ग्राम पंचायत बावड़ी के रहइया श्री सुखलाल अउ ओकर परिवार के रोज के दुख-पीरा रहिस। पइसा के तंगी के सेती एक मजबूत अउ पक्का घर बनाना ओ मन बर कोनो सपना ले कम नई रहिस, फेर केंद्र सरकार के प्रधानमंत्री आवास योजना-ग्रामीण ह सुखलाल के परिवार के ए कइ बछर पुराना सपना ला सच म बदल देहे हे।
कच्चा मकान के दुख-पीरा ले सुग्घर मकान तक के सफर
सुखलाल के परिवार कइ बछर ले एक अइसन कच्चा मकान म रहे बर मजबूर रहिस, जिहां हर बदलत मौसम ह नवा चुनौती लेके आवत रहिस। खास करके झड़ी के बखत छानी ले पानी चूहे के सेती पूरा परिवार के रात ह जागत बीतत रहिस। पइसा के कमी आड़े आए के सेती पक्का मकान बनाना असंभव सही लागत रहिस।
वित्तीय सहायता रासि सीधा सुखलाल के बैंक खाता म गीस
अइसन विषम परिस्थिति म ‘प्रधानमंत्री आवास योजना-ग्रामीण’ परिवार बर एक सहारा बनके आईस। योजना के तहत साफ-सुथरा प्रक्रिया ले सुखलाल के परिवार के चुनाव होईस अउ वित्तीय सहायता रासि सीधा ओकर बैंक खाता म जमा करे गीस। शासन के ए सहायता अउ परिवार के मेहनत ले पुराना कच्चा कुंदरा के जगा म एक मजबूत, सुरुक्षित अउ पक्का कुरिया ठाढ़ हो गे।
जिंदगी म आईस सकारात्मक बदलाव
नवा पक्का घर बने ले न सिरीफ कुदरती आफत ले सुरुक्षा मिलिस, भलुक परिवार के सामाजिक अउ मानसिक जिंदगी म घलो बड़का बदलाव आईस। अब पानी गिरे म छानी ले पानी चूहे के या जाड़ अउ घाम के डर सिरा गे हे। पहिली जिहां मौसम के अनिश्चितता के बीच लइका मन के पढ़ई म बाधा आवत रहिस, उहें अब सुरुक्षित अउ सांत माहौल मिले ले लइका मन पूरा मन लगाके अपन पढ़ई म ध्यान देवत हवयं। पक्का मकान ह परिवार ला समाज म इज्जत अउ आत्म-सम्मान के नवा चिनहा देहे हे।
प्रधानमंत्री आवास के बदलत हमार कइ बछर जुन्ना सपना होईस सच
श्री सुखलाल ह कहिस के ए पक्का घर हमार बर सिरीफ ईंटा अउ सीमेंट के चार ठन भितिया नो हे, भलुक ए हा हमार बर एक सुरक्षित अउ सम्मानजनक जिंदगी के नवा अध्याय ए। प्रधानमंत्री आवास योजना-ग्रामीण के सेती हमार कइ बछर जुन्ना सपना सच होए हे। अब मोर परिवार पूरा सुरक्षित हे अउ लइका मन के बने भविस्य के रद्दा आसान हो गे हे।
सुखलाल के परिवार के भविस्य के मजबूत नेंव
सुखलाल के परिवार के सफलता के ए कहानी साबित करथे के पक्का मकान सिरीफ एक छानी नई होवय, भलुक ए हा कोनो परिवार के सुरक्षा, आत्मभरोसा अउ उज्जर भविस्य के मजबूत नेंव होथे। छत्तीसगढ़ के दूर-दराज ग्रामीण अंचल मन म ‘प्रधानमंत्री आवास योजना-ग्रामीण’ के जरिया सरलग जरूरतमंद परिवार मन के जिंदगी ला सुगम अउ सुरक्षित बनाए जात हे।
