प्रधानमंत्री मातृ वंदन योजना ले सुरक्षित मातृत्व अऊ बढ़िया पोषण ल मिलत हे सहारा

कबीरधाम/बेमेतरा, गर्भवती महिला अऊ नवजात लइका मन के स्वास्थ्य अऊ पोषण ल मजबूत करे के उद्देश्य ले केंद्र सरकार डहर ले चलाय जात प्रधानमंत्री मातृ वंदन योजना, राज्‍य म सुरक्षित मातृत्व के दिशा म एक ठन सशक्त पहल के रूप म आघू आवत हे। योजना के अंतर्गत गर्भावस्था के दौरान महिला मन ल आर्थिक मदद देहे जाथे, जेकर ले ओ मन पौष्टिक आहार, जरूरी स्वास्थ्य जांच अऊ देखभाल पक्का कर सकंय।
कबीरधाम जिला के वार्ड क्रमांक 07 के रहवइया श्रीमती संजू तिवारी अऊ बेमेतरा जिला के बेरलाकला गांव के श्रीमती मुकेश्वरी साहू ए योजना ले लाभ लेवइया महिला मन म सामिल हवंय। श्रीमती संजू तिवारी ल पहिली लइका के जनम म तीन किस्त म 5 हजार रूपिया अऊ दूसर संतान नोनी होय म 6 हजार रूपिया के अतिरिक्त मदद मिलिस। ओ बताइस के ए राशि के उपयोग दूध, फल, पौष्टिक भोजन अऊ स्वास्थ्य संबंधी जरूरत मन बर करे गीस, जेकर ले गर्भावस्था के दौरान ओ ल भारी लाभ मिलिस।
उहें बेमेतरा जिला के श्रीमती मुकेश्वरी साहू, जे एक ठन साधारण किसान परिवार ले हवंय, ओला पहली गर्भावस्था के दौरान आंगनबाड़ी कार्यकर्ता अऊ मितानिन के माध्यम ले योजना के जानकारी मिलिस। पात्रता के आधार म ओ ल समय म किस्त म 5 हजार रूपिया के सहायता राशि मिलिस, जेकर ले ओ पौष्टिक आहार अऊ डाक्टरी जांच कराइस। आज ओ अऊ ओकर लइका पूरा तरह ले स्वस्थ हवंय।
लाभ लेवइया महिला मन ह प्रधानमंत्री मातृ वंदन योजना ल गर्भवती महिला मन बर आर्थिक सहारा, आत्मविश्वास अऊ मानसिक शांति देवइया योजना बताय हवंय। ए योजना न सिरिफ महतारी अऊ लइका के स्वास्थ्य ल मजबूत करत हे, बल्कि सुरक्षित मातृत्व अऊ नोनी जनम ल घलो बढ़ावा देवत हे।