प्रधानमंत्री टीबी मुक्त भारत अभियान: मुंगेली के उर्मिला घोसले ह टीबी ला दीस मात, नियमित उपचार अउ पौष्टिक आहार ले मिलिस नवा जीवन

मुंगेली, प्रधानमंत्री टीबी मुक्त भारत अभियान के तहत मुंगेली जिला के ग्राम रोहराखुर्द के रहवइया 35 बछर के श्रीमती उर्मिला घोसले ह नियमित उपचार, पौष्टिक आहार अउ स्वास्थ्य विभाग के निगरानी के बल म टीबी जइसे गंभीर बीमारी ला मात देहे हे। उर्मिला एक महीना ले खाँसी अउ बुखार ले पीड़ित रहिस, अउ मितानिन संतोषी दिवाकर के संपर्क म आए के बाद ओ ह जिला अस्पताल मुंगेली म बलगम के जांच कराईस, जेमा टीबी के पुष्टि होए के बाद इलाज शुरू होइस। उर्मिला के स्थिति ला देखत प्राथमिक स्वास्थ्य केंद्र पदमपुर के चिकित्सा अधिकारी डॉ. मनीष बंजारा ह निक्षय मित्र बनके ओला गोद लीस अउ हर महीना प्रोटीन युक्त पोषण आहार उपलब्ध कराईस। लगातार छै महिना तक नियमित दवाई, पौष्टिक आहार अउ स्वास्थ्य विभाग के सतत निगरानी ले उर्मिला पूरा स्वस्थ हो गे, जेकर पुष्टि जिला अस्पताल के जांच म होए हे। उर्मिला ह ए सफलता बर प्रधानमंत्री टीबी मुक्त भारत अभियान, निक्षय मित्र डॉ. मनीष बंजारा अउ स्वास्थ्य विभाग के प्रति आभार जतावत मनखे मन ला अपील करिस के बीमारी के लक्षण दिखे म समय म जांच जरूर करावंय। डॉ. मनीष बंजारा ह घलो कहिन के टीबी के समय म पता चले अउ पूरा उपचार लेहे ले मरीज पूरा स्वस्थ हो जाथे।