नारायणपुर : सनवरी के प्रधानमंत्री आवास बनाए के सपना होय पूरा

नारायणपुर,  प्रधानमंत्री आवास योजना के तहत् देश के गरीब अऊ बेआवास मनखे मन ल आवास बनवाए बर सहायता राशि देहे जाथे, अऊ ए राशि के मदद ले गरीबी रेखा के नीचे जीवन यापन करइया नागरिक खुद के आवास बनाए म सक्षम हो पात हें, ए योजना के संग भारत के बेआवास अऊ गरीब नागरिक मन ल आवास देहे के काम सरकार सरलग करत हे। पक्का आवास मिले म जिला के ग्राम पंचायत टिमनार निवासी सनवरी पति घसिया वड्डे ह सरकार के आभार जताए हे। सनवरी खेती अउ मजदूरी करके जीवन यापन करथे। साल 2022-23 म वोकर प्रधानमंत्री आवास योजना ग्रामीण पास होइस। सनवरी अऊ वोखर परिवार पहिली कच्चा छत खपरैल के मकान म रहत रहिन, जेखर से कुटुंब ल बहुत अकन समस्या ले जूझना परय। अब पक्का मकान मिले ले हितग्राही अड़बड़ खुश हे अउ अपन नवा आवास म निवासरत हे। वो ह बताइस के प्रधानमंत्री आवास ग्रामीण योजना के तहत् वोला 1 लाख 30 हजार के राशि सीधा वोखर बैंक खाता म मिल गे। सनवरी ह छत्तीसगढ़ शासन के आभार व्यक्त करत प्रधानमंत्री श्री नरेंद्र मोदी अउ मुख्यमंत्री श्री विष्णुदेव साय ल धन्यवाद ज्ञापित करे हे।