प्रधानमंत्री जनमन योजना ले फुलेश्वर के पक्का मकान के सपना होइस सच

धमतरी, विशेष पिछड़ी जनजाति वर्ग के मनखे मन बर प्रधानमंत्री जनमन योजना वरदान साबित होवत हे। ए योजना ले शासन के जनकल्याणकारी योजना मन के लाभ धमतरी जिला के कमार समुदाय के मनखे मन ल सीधा-सीधा मिलत हे। पीएम जनमन योजना के तहत धमतरी जिला के दूरस्थ वनांचल नगरी के कल्लेमेटा के विशेष पिछड़ी जनजाति समुदाय कमार वर्ग के हितग्राही श्री फुलेश्वर के खुद के पक्का आशियाना के सपना साकार होय हे। फुलेश्वर ह घर पूरा होए म खुशी जाहिर करत बताइस के प्रधानमंत्री जनमन योजना ह वोखर दशा अऊ दिशा बदल देहे हे। योजना के तहत साल 2023-24 म ओ ल घर के मंजूरी मिलीस। पंचायत स्तर म कागद मन के पूर्ति होए के संग घर बनाए के काम शुरू करे गीस। ये मां पहली किश्त के तौर म 40 हजार रूपिया मिलतेच ओखर मकान बने के उम्मीद पक्का होए लगीस। श्री फुलेश्वर कमार ह तकनीकी मार्गदर्शन के आधार म घर बनवाए के काम शुरू करिस। मकान निर्माण आगू बढ़े के संग प्रगति के आधार म क्रमशः दुसरा किश्त 60 हजार रूपिया, तीसर किश्त 80 हजार रूपिया अऊ चौथइया किश्त 20 हजार रूपिया के राशि मिलत गीस अऊ देखतेच देखत वोखर सपना के आशियाना पूरा होके तैयार हो गे। श्री फुलेश्वर कमार ह बताइस के घर बनाए म काम करे म मनरेगा के तहत ओ ल 90 दिन के मजदूरी के भुगतान घलोक करे गीस।
श्री फुलेश्वर कमार अपन जुन्ना दिन के कठिनाई ल सुरता करत बताथे के वो एक राजमिस्त्री हे। रोजी-मजदूरी करके अपन परिवार के पालन-पोषण करते हे। ओखर परिवार कच्ची झोपड़ीनुमा घर म निवास करत रहिस। जहां जीवन व्यतीत करना बहुत कठिन रहिस। मौसम के अनुसार बहुत अकन कष्ट के सामना करना परत रहिस। बरसात के दिन म छत ले पानी टपकना, दीवार म सीलन आना, संगेच सर्दी के समय रात म ठण्ड के कारण नींद नइ आत रहिस। संगेच साल भर जहरीला कीड़ा, सांप, बिच्छू आदि के डर बने रहत रहिस। अब पक्का मकान के बन जाय ले वोखर ये समस्या मन दूर हो गए हे। अब ओ अपन परिवार के संग पक्का मकान म चैन के नींद सुतत हे। पक्का छत वाले घर होए ले वोखर समाज म प्रतिष्ठा बाढ़े हे। उमन नवा घर म परिवार के संग हंसी-खुशी जीवन व्यतीत करत हे। वो ह विशेष पिछड़ी जनजाति परिवार के आशियाना के सपना ल पूरा करे बर देश के प्रधानमंत्री श्री नरेन्द्र मोदी अऊ प्रदेश के मुख्यमंत्री श्री विष्णुदेव साय के सहृदय धन्यवाद ज्ञापित करे हे।