बिहान योजना ले आइस प्रमिला के जिनगी म बदलाव, सिलाई अउ कुक्कुट पालन ले बनिस आत्मनिर्भर

CHHATTISGARHI NEWS: रायपुर, छत्तीसगढ़ सरकार के गोधन न्याय योजना अउ बिहान योजना ग्रामीण इलाका के महिला मन बर आर्थिक मजबूती के बड़े जरिया बनत हवय। इही कड़ी म रायपुर जिला के प्रमिला साहू अपन मेहनत अउ शासन के योजना मन के मदद ले एक सुग्घर मिसाल पेश करे हवय। पहिली प्रमिला के परिवार ला आर्थिक तंगी अउ कई किसिम के चुनौती मन के सामना करे बर परत रहिस, फेर बिहान योजना से जुड़े के बाद उंखर जिनगी बदलगे अउ उनला आगू बढ़े के रद्दा मिलगे।
बिहान योजना ले जुड़े के बाद प्रमिला ल स्व-सहायता समूह के माध्यम से अलग-अलग आजीविका गतिविधि मन ले जोड़े गीस। उनला सिलाई-कढ़ाई के बेहतर ट्रेनिंग मिलिस, जेकर से वो हा अपन घरे म सिलाई के काम शुरू कर दिस। ए काम ले आसपास के गाँव मन ले कपड़ा सिलाई के आर्डर मिले लगगे, जेकर से वोला नियमित आमदनी होए लागिस। सिलाई के संगे-संग प्रमिला कुक्कुट पालन मने मुर्गी पालन के काम घलो चालू करिस।
ए दुनो काम—सिलाई अउ कुक्कुट पालन—खेती-किसानी के संगे-संगे उंखर परिवार बर आमदनी के मजबूत जरिया बनगे। पहिली जिहाँ परिवार के गुजारा करे म मुसकिल होवत रहिस, उहें अब प्रमिला अपन परिवार ला एक बढ़िया अउ खुसहाल जिन्दगी देवत हवय। अपन लइका मन के पढ़ई-लिखई अउ घर-परिवार के खरचा ला संभाले म अब उनला कोनो किसिम के परेशानी नइ होवत हवय।
प्रमिला के ए सफलता बताथे के ग्रामीण महिला मन ल जब सही समय म सही अवसर अउ वित्तीय मदद मिल जाथे, त उमन कइसे आत्मनिर्भर बनके समाज म अगुआ बन सकथें। बिहान योजना जइसे पहल ग्रामीण क्षेत्र के महिला मन के आर्थिक स्थिति मजबूत करत हवय अउ उंखर आत्मविश्वास ला बढ़ावत हवय, जेकर से पूरा छत्तीसगढ़ के ग्रामीण अर्थव्यवस्था म सकारात्मक बदलाव आवत हवय अउ महिला मन स्वावलंबन के रद्दा म लगातार आगे बढ़त हें।