प्रशांत किशोर के राहुल उपर तंज, बोलिस- ट्वीट अऊ कैंडिल मार्च ले भाजपा ल हराना मुश्किल

चुनावी रणनीतिकार प्रशांत किशोर ह कांग्रेस पार्टी उपर फेर जुबानी हमला करे हे। वो ह कहे हे कि कांग्रेस के बिना घलोक भारत म विपक्ष संभव हे। वो ह कांग्रेस ल सलाह देवत कहिस कि अगर पार्टी ल बचाना हे त गांधी परिवार ले बाहिर के कोनो नेता ल लोकतांत्रिक तरीका ले अध्यक्ष चुनव। संगेच वो ह राहुल गांधी उपर तंज कसत ये घलोक कहिस के ट्वीट अऊ कैंडिल मार्च के संग आप मन भाजपा ल हरा नइ सकव।
इंडिया टुडे ल देहे एक इंटरव्यू म प्रशांत किशोर ह 2024 के आम चुनाव म विपक्ष बर भाजपा ले मुकाबला करे बर अपन ब्लू प्रिंट घलोक पेश करिस। वो ह कांग्रेस उपर निशाना साधत कहिस कि देश के सबले जुन्ना पार्टी के बिना भाजपा विरोधी मोर्चा बनाना संभव हे।
प्रशांत किशोर ह कहिस कि 1984 के बाद कांग्रेस ल अकेला एके लोकसभा चुनाव म जीत मिले हे। बीते दस साल म कांग्रेस ल 90 प्रतिशत चुनाव म हार मिले हे। कांग्रेस नेतृत्व ल हार के जिम्मेदारी लेना चाही। पीके ह कहिस कि मैं करीबन कांग्रेस जॉइन कर ले रहेंव। वो ह पीएम मोदी के तारीफ करत कहिस कि वो सबो के सुनथे। इही वोखर ताकत ये। ओ ल पता हे कि आखिर मनखे मन ल का चाही। पीके ह ये घलोक कहिस कि अगले कुछ दशक तक भाजपा के तीरे-तीर देश के राजनीति घूमही।
हम आप मन ल बता देवन कि प्रशांत किशोर अभी ममता बनर्जी के चुनावी रणनीति रहिस हे। एखर ले पहिली वोला 2014 के लोकसभा चुनाव म भाजपा ह अऊ एखर अलावा नीतीश कुमार, राहुल गांधी, अखिलेश यादव, एम.के. स्टालिन, जगन मोहन रेड्डी, अरविंद केजरीवाल अऊ कैप्टन अमरिंदर सिंह मन घलोक चुनाव रणनीति बनाए रहिन।