रायपुर, 17 मई 2020। कोरोना संकट के सेती प्रवासी मजदूर मन के अपन राज्य म वापस लहुटई सरलग चलत हे। मजदूर मन ल लम्बा दूरी के यात्रा के समय कई कठिनाई मन के सामना करना परत हे। मुख्यमंत्री श्री भूपेश बघेल के नेतृत्व म छत्तीसगढ़ शासन ह प्रवासी मजदूर मन के हित ल ध्यान म रखत सीमा के चेक पोस्ट संग आवागमन बर चिन्हित रास्ता मन म मजदूर मन के सहायता बर उचित प्रबंध करे हे। बलरामपुर-रामानुजगंज के सीमा झारखण्ड, उत्तरप्रदेश, मध्यप्रदेश ले लगथे, अड़बड़ झन मजदूर मन ए रास्ता ले होके गुजरत हें। जिला प्रशासन ह शुरू ले ही मजदूर मन के हर संभव सहायता करत हे अऊ ओ मन ल भोजन, पानी, चरण पादुका के वितरण अउ स्वास्थ्य संबंधी निःशुल्क व्यवस्था उपलब्ध करवावत हे।
जिला प्रशासन ह मजदूर मन के सहायता बर उचित व्यवस्था करत हे। सबो चेकपोस्ट मन म मजदूर मन बर भोजन, पानी अऊ स्वास्थ्य सुविधा के संगेच चरण पादुका बांटे जात हे। गर्मी के मौसम म पांव म चप्पल नइ होवइ कोनो अभिशाप ले कम नइ हे। अइसन मुश्किल समय म प्रशासन कोति ले करे जात सहायता ले उंखर दिक्कत कम होवत हे। वाड्रफनगर के धनवार स्थित चेकपोस्ट म पहुंचे, प्रवासी मजदूर मन ल जब चप्पल बांटे गीस त मजदूर मन ह हाथ जोड़के शासन-प्रशासन के सहयोग के प्रति आभार व्यक्त करिन। अइसनहे ककना स्थित चेकपोस्ट म प्रशासन के सहयोग ले स्वयं सेवी संस्था मन ह चिलचिलात गर्मी ल देखत बचाव बर गमछा तको बांटिन। स्वास्थ्य कर्मि मन ह कोरोना वायरस अऊ गर्मी ले बचाव के जानकारी मजदूर मन ल देवत हें। शरीर म पानी के कमी झन होवय एकर विशेष ध्यान रखे ल कहे जात हे।
