कड़ी मेहनत अऊ अनुशासन ले प्रयास विद्यालय के लइका मन ल मिलीस शानदार सफलता

दसवीं बोर्ड के परीक्षा परिणाम 99.3 प्रतिशत अऊ 12वीं बोर्ड के 97.22 प्रतिशत रहिस
दसवीं के 07 लइका मन ह बनाइन मेरिट म स्थान
पाछू के साल मन म 1469 लइका आईआईटी, एनआईटी, इंजीनियरिंग, एमबीबीएस, क्लैट अऊ सीए बर होइन हे सफल
प्रमुख सचिव श्री सोनमणि बोरा ह पढ़ईया लईका मन ल दीन बधाई अउ शुभकामना

रायपुर, 18 मई 2024। माध्यमिक शिक्षा मण्डल कोति ले हाले म घोषित 10वीं अऊ 12वीं बोर्ड के परीक्षा परिणाम म प्रयास आवासीय विद्यालय के लइका मन ल एक पइत फेर शानदार सफलता मिले हे। प्रयास विद्यालय म 10वीं बोर्ड के परीक्षा परिणाम 99.3 प्रतिशत अउ 12वीं बोर्ड के परीक्षा परिणाम 97.22 प्रतिशत रहिस। एमां 10वीं म पहिली श्रेणी म उत्तीर्ण पढ़ईया लईका मन के प्रतिशत 96.45 अउ 12वीं म 82.02 प्रतिशत रहिस। ए साल के परीक्षा परिणाम पउर साल के तुलना म काफी अच्छा हे। पउर साल 10वीं म 90.70 प्रतिशत अऊ 12वीं म 79.38 फीसदी रहिस। प्रदेश के प्रयास विद्यालय मन के छात्र-छात्रा म ल बेहतर प्रदर्शन बर आदिम जाति, अनुसूचित जाति, पिछड़ा वर्ग अउ अल्प संख्यक कल्याण विभाग के प्रमुख सचिव श्री सोनमणि बोरा अऊ सचिव श्री नरेन्द्र दुग्गा ह बधाई अउ शुभकामना देहे हे।

जानबा हे कि पाछू बछर ले प्रयास आवासीय विद्यालय के लइका मन ह कई ठन राष्ट्रीय अउ राज्य स्तरीय प्रतियोगी परीक्षा मन म उत्कृष्ट प्रदर्शन करे हें। अब तक प्रयास आवासीय विद्यालय के 116 विद्यार्थी आईआईटी अउ समकक्ष म, 328 विद्यार्थी एनआईटी अउ समकक्ष म, 940 विद्यार्थी इंजीनियरिंग कॉलेज म अउ 52 विद्यार्थी एम.बी.बी.एस. म चुने गे हें। एखर अलावा सीए, सीएस, सीएमए म 29 अउ क्लैट म 04 विद्यार्थी ल सफलता होए हें।
अधिकारी मन ह बताइन कि प्रदेश म प्रयास आवासीय विद्यालय मन के संख्या 14 हो गे हे। एमां रायपुर जिला म बालक अउ कन्या बर अलग-अलग प्रयास आवासीय विद्यालय सडडू अउ गुढियारी म संचालित हे। एखर ले अकतहा बिलासपुर, सरगुजा, दुर्ग, बस्तर, कांकेर, कोरबा, जशपुर अउ बालोद जिला म छात्र-छा़त्राओं बर प्रयास आवासीय विद्यालय संचालित करे जात हे।