सुरक्षित मातृत्व कोति बढ़त हे छत्तीसगढ़

प्रधानमंत्री सुरक्षित मातृत्व अभियान ले महिला मन ल मिलत हे लाभ
जांच, इलाज अऊ परामर्श – एके छत के नीचे मिलत हे संपूर्ण मातृत्व सेवा
दंतेवाड़ा, छत्तीसगढ़ म मातृ अउ शिशु स्वास्थ्य ल प्राथमिकता देवत मुख्यमंत्री श्री विष्णु देव साय अऊ स्वास्थ्य मंत्री श्री श्याम बिहारी जायसवाल के अगुवइ म राज्य सरकार कोति ले प्रधानमंत्री सुरक्षित मातृत्व अभियान ल प्रभावी ढंग ले लागू करे जात हे। विशेषकर आदिवासी अंचल दंतेवाड़ा म ये अभियान गर्भवती महिला मन बर वरदान सिद्ध होवत हे।
मुख्यमंत्री श्री विष्णु देव साय ह हाले म कहे रहिन के माता मन के स्वास्थ्य ही समाज के नींव हे। राज्य सरकार के संकल्प हे के हरेक महिला ल सुरक्षित मातृत्व अऊ नवजात ल स्वस्थ जीवन मिलय। स्वास्थ्य मंत्री श्री श्याम बिहारी जायसवाल ह अभियान के समीक्षा करत ये ठउका करिन के राज्य के हर जिला म मातृ स्वास्थ्य सेवा गुणवत्तापूर्ण अऊ समयबद्ध सुलभ होही।
दंतेवाड़ा जिला म अभियान ल प्रभावी बनाए बर जिला प्रशासन कोति ले प्रसव पूर्व विशेष जांच शिविर मन के आयोजन करे जात हे। कलेक्टर श्री कुणाल दुदावत के निर्देशन म जिला के सबो प्राथमिक स्वास्थ्य केंद्र, सामुदायिक स्वास्थ्य केंद्र अऊ जिला अस्पताल मन म ये अभियान युद्धस्तर म चलाय जात हे।
अभियान ल सुचारु रूप ले संचालित करे बर 102 एंबुलेंस सेवा अऊ संस्थागत वाहन मन के कुशलतापूर्वक उपयोग करे जात हे ताकि ग्रामीण अउ सुदूर अंचल ले घलोक महिला मन समय म स्वास्थ्य संस्थान तक पहुंच सकंय। ये अभियान नइ केवल मातृत्व अउ शिशु मृत्यु दर म कमी लाय के दिशा म अहम भूमिका निभावत हे, बल्कि मातृत्व स्वास्थ्य के क्षेत्र म छत्तीसगढ़ ल एक आदर्श राज्य के रूप म स्थापित करत हे।