रायपुर, राष्ट्रीय आदिवासी नृत्य महोत्सव के तैयारी स्थानीय साईंस कालेज मैदान म जोर से चलत हे। संस्कृति विभाग के सचिव श्री सिद्धार्थ कोमल सिंह परदेशी ह आज साईंस कालेज मैदान पहुंचके तैयारी के जायजा लीन अऊ अधिकारी मन ल ये संबंध म जरूरी दिशा-निर्देश दीन। ये बेरा कलेक्टर डॉ. एस.भारतीदासन, वरिष्ठ पुलिस अधीक्षक श्री आरिफ शेख, संस्कृति विभाग के संचालक श्री अनिल कुमार साहू संग आन संबंधित विभागीय अधिकारी उपस्थित रहिन।
हम आप ल ब ता देवन के राजधानी रायपुर के साईंस कॉलेज मैदान म 27 दिसम्बर ले शुरू होवत तीन दिवसीय राष्ट्रीय आदिवासी नृत्य महोत्सव के आयोजन के तैयारी तेज गति ले चलत हे। ये उत्सव म दू दर्जन ले घलोक जादा राज्य अऊ केन्द्र शासित प्रदेश अऊ आन देश मन के करीबन 80 जनजातीय नृत्य दल के 1200 कलाकार सामिल होवत हे। महोत्सव म आन देश के कलाकार घलोक सामिल होहीं।
कार्यक्रम के पहिली दिन 27 दिसम्बर के उद्घाटन सत्र के बाद विदेशी नृत्य दल मन म ले थाईलैण्ड, श्रीलंका अऊ बेलारूस के दल अपन प्रस्तुति देंहीं अऊ भोजन अवकाश के बाद युगांडा, मालदीव अऊ बांग्लादेश के कलाकार मन के रंगारंग प्रस्तुति होही। ये पहिली अवसर हे कि रायपुर म आयोजित होवत ये आदिवासी नृत्य समारोह म अतका बड़ संख्या म देश-विदेश के आदिवासी नर्तक सामिल होवत हें। महोत्सव म 27 ले 29 दिसम्बर तक भिनसरहा 9.00 बजे ले रात 9.00 बजे तक सांस्कृतिक कार्यक्रम होही। साईंस कॉलेज मैदान स्थित आयोजन स्थल म एक हाट-बाजार घलोक रहिही जेमां जनजातीय लोक शिल्प के उत्कृष्ट अऊ कलात्मक उत्पाद विक्रय बर उपलब्ध होही। एखर अलावा फूड जोन म छत्तीसगढ़ी व्यंजन मन के संगें-संग कई प्रकार के व्यंजन के घलोक मनखे लुफ्त उठा सकहीं।
