राजधानी रायपुर म 12 ले 14 जनवरी तक युवा महोत्सव के होही आयोजन
रायपुर, राष्ट्रीय एकता, सामुदायिक सहभागिता अऊ भाईचारा ल बढ़ावा देहे के उद्देश्य ले छत्तीसगढ़ के राजधानी रायपुर म राज्य युवा महोत्सव के आयोजन करे जाही। साइंस कॉलेज मैदान, पंडित दीनदयाल उपाध्याय ऑडिटोरियम, पंडित रविशंकर शुक्ल विश्वविद्यालय परिसर संग आन जगा म तीन दिन तक चलइया युवा महोत्सव म 821 प्रकार के प्रतियोगिता मन के आयोजन करे जाही। जेमां 6864 भाग लेवइया सामिल होही। जिला अऊ ब्लॉक स्तर म होए युवा उत्सव के आयोजन के बाद विजेता मन ल अब राज्य युवा महोत्सव म अपन प्रतिभा देखाय के अवसर मिलही। राज्य युवा महोत्सव के विजेता मन ल नगद पुरस्कार दिए जाही। मुख्य सचिव श्री आर.पी. मण्डल ह आज मंत्रालय महानदी भवन म राज्य युवा महोत्सव के आयोजन बर गठित अंतर्विभागीय समन्वय समिति के बैठक म विभागीय अधिकारी मन ल कहिन कि महोत्सव म सामिल होए पहुंचत राज्यभर के युवा मन ल राज्य के सांस्कृतिक अस्मिता-वैभव अऊ विरासत के जानकारी देहे बर विभाग कोति ले आयोजन स्थल म प्रदर्शनी घलोक लगाए जाय। जेमां विशेष रूप ले छत्तीसगढ़ म पर्यटन, रोजगार मार्गदर्शन, छत्तीसगढ़ म गांधी जी के यात्रा, कौशल विकास ले संबंधित जानकारी होवय। मुख्य सचिव ह महोत्सव म सामिल होवइया मन के रहे, भोजन, आवागमन, स्वास्थ्य, सुरक्षा संग आन व्यवस्था करे के हुकुम दीन।
बैठक म खेल अउर युवा कल्याण विभाग के सचिव श्री परदेशी कोमल सिद्धार्थ ह बताइस कि राज्य युवा महोत्सव के शुभारंभ 12 जनवरी 2020 के बिहनिया 11 बजे छत्तीसगढ़ राज्य के राज्यपाल सुश्री अनुसुईया उइके ह करहीं। युवा महोत्सव म 37 श्रेणि के कई प्रतियोगिता के आयोजन करे जाही। जेमां 28 सांस्कृतिक कार्यक्रम, चार शैक्षणिक कार्यक्रम अऊ पांच पारंपरिक कार्यक्रम सामिल हे। राजधानी के 10 स्थान मन म एकर आयोजन करे जाही। राज्य युवा महोत्सव म 4043 पुरूष भाग लेवइया अऊ 2821 महिला भाग लेवइया सामिल होही। एकल अऊ समूह के रूप म कई प्रकार के खेल मन के आयोजन करे जाही। विजेता मन ल नगद पुरस्कार ले सम्मानित करे जाही। राज्य युवा महोत्सव के समापन 14 जनवरी के करे जाही। सामुहिक प्रतियोगिता मन के विजेता मन ल पहिली पुरस्कार दस हजार, दूसर पुरस्कार सात हजार पांच सौ अऊ तीसर पुरस्कार पांच हजार रूपिया दिए जाही। एकल विधा मन बर पहिली पुरस्कार एक हजार, दूसर पुरस्कार सात सौ अऊ तीसर पुरस्कार पांच सौ रूपिया दिए जाही।
बैठक म अपर मुख्य सचिव वित्त श्री अमिताभ जैन, प्रमुख सचिव वन श्री मनोज पिंगवा, सचिव संसदीय काम श्री सोनमणी बोरा, सचिव लोक स्वास्थ्य अउर परिवार श्रीमती निहारिका बारिक, सचिव खाद्य डॉ. कमलप्रीत सिंह, सचिव सामान्य प्रशासन सुश्री रीता शांडिल्य, पुलिस विभाग के श्री अशोक जुनेजा, कलेक्टर रायपुर डॉ. भारतीदासन, पुलिस अधीक्षक श्री आरिफ शेख संग जम्मो विभाग मन के वरिष्ठ अधिकारी उपस्थित रहिन।
