छत्तीसगढ़िया थीम के आधार म तियार होथे उत्सव के माहौल
कल भिनसरहा 10.00 बजे सीएम हाउस म पधारहीं माता-बहिनी मन
रायपुर, तीन दिन तक चलइया छत्तीसगढ़ के पारंपरिक तीजा- पोरा परब के अछाह अब जोर पकड़त हे। बाजार मन म रौनक हे अऊ तिजहरिन माता-बहिनी मन, किसान भाई अऊ आम जन ये तिहार ल पूरा उछाह के संग मनाए बर तैयारी म म जुटे हें। तीजा- पोरा परब के अवसर म पउर साल जइसे ये साल घलोक 27 अगस्त के भिनसरहा 10.00 बजे ले मुख्यमंत्री निवास म भव्य उत्सव के आयोजन करे जाही। एखर बर इहां जोर-शोर ले तैयारी चलत हे।
ठेठ पारंपरिक अंदाज म मुख्यमंत्री निवास के प्रांगण ल सजाए जात हे। इहां के पूरा माहौल उत्सव के जइसे रंग- बिरंगी अऊ हमर छत्तीसगढ़िया संस्कृति के झलक दिखात नजर आवत हे। बहुत अकन नंदी बइला ये प्रांगण म जगा- जगा सजे नजर आवत हे, जेन समृद्धि अऊ खुशहाली के एहसास दिलावत हे। सूपा अऊ टुकनी म रंग के खूबसूरत कारीगरी के संग ए मन ल जगा-जगा सुग्घर अंदाज म सजाए गए हे। रंग-बिरंगा तोरण अऊ पारंपरिक कलाकारी, उत्सव के थीम के जइसे इहां के खूबसूरती ल बढ़ावत हे।
मुख्यमंत्री निवास के माहौल ठेठ छत्तीसगढ़िया तीजा- पोरा वाला दिखत हे। प्रदेश के मुखिया मुख्यमंत्री श्री भूपेश बघेल ह माता-बहिनी मन ले अपील करे हें कि ओ मन ये उत्सव म सामिल होके मुख्यमंत्री निवास के शोभा बढ़ावयं। उत्सव म महिला पत्रकार मन ल घलोक विशेष रूप ले आमंत्रित करे गए हे। तिजरहिन माता-बहिनी मन मुख्यमंत्री निवास ल अपन मईके समझके इहां आवयं, उंखर स्वागत हे।
