छत्तीसगढ़ ह एक पइत फेर राष्ट्रीय पटल म बनाइस अपन चिन्‍हारी

राष्ट्रपति ह छत्तीसगढ़ ल करिन सम्मानित: आदि कर्मयोगी अभियान अऊ पीएम जनमन योजना म सर्वश्रेष्ठ प्रदर्शन करइया राज्य घोषित
जनजातीय सशक्तिकरण के क्षेत्र म पांच जिला मन ल मिलीस राष्ट्रीय पहिचान
मुख्यमंत्री श्री विष्णु देव साय अऊ मंत्री श्री नेताम ह दीन बधाई अऊ शुभकामना
राष्ट्रपति के हाथ राज्य सरकार कोति ले प्रमुख सचिव श्री सोनमणि बोरा ह करिन सम्मान ग्रहण
रायपुर, छत्तीसगढ़ ह एक पइत फेर राष्ट्रीय पटल म अपन सशक्त पहिचान दर्ज कराए हे। आदि कर्मयोगी अभियान अऊ प्रधानमंत्री जनमन योजना के उत्कृष्ट क्रियान्वयन खातिर राज्य ल काली भारत के राष्ट्रपति श्रीमती द्रौपदी मुर्मू ह ‘सर्वश्रेष्ठ प्रदर्शन करइया राज्य’ के रूप म सम्मानित करिन। ये सम्मान राजधानी दिल्ली के विज्ञान भवन म आयोजित एक भव्य समारोह म देहे गीस। राज्य सरकार अऊ जनजातीय विकास विभाग कोति ले ये सम्मान प्रमुख सचिव श्री सोनमणि बोरा ह राष्ट्रपति के हाथ ले झोंकिन।
प्रमुख सचिव श्री बोरा ह ए मौका म पीएम जनमन योजना अऊ धरती आबा ग्राम उत्कर्ष अभियान के तहत छत्तीसगढ़ म जनजाति अऊ विशेष रूप ले पिछड़ी जनजाति मन के विकास खातिर होवत काम मन के संबंध म परखर जानकारी दीन। उहें मोहला-मानपुर-अंबागढ़ चौकी के कलेक्टर श्रीमती तुलिका प्रजापति ह घलो जिला मन म जनजाति के विकास म होवत काम मन के जानकारी दीन। कार्यक्रम म केंद्रीय जनजातीय कार्य मंत्री श्री जुआल ओराम अऊ राज्य मंत्री श्री दुर्गा दास उइके, जनजातीय कार्य मंत्रालय के सचिव विभु नायर घलोक उपस्थित रहिन।
मुख्यमंत्री श्री विष्णुदेव साय ह ए उपलब्धि म जम्‍मो विभागीय अधिकारी अऊ फील्ड टीम ल बधाई देवत कहिन के ये सम्मान राज्य के वो कर्मयोगी मन के मेहनत अऊ समर्पण के चिन्‍हारी हे, जे मन ह जनजातीय सशक्तिकरण ल धरातल म साकार करे हें।
कार्यक्रम म धमतरी अऊ कोरिया जिला मन ल घलोक उत्कृष्ट प्रदर्शन खातिर सम्मानित करे गीस। एखर संगेच जनजाति विभाग के स्टेट ट्रेनर श्री ललित शुक्ला ल घलोक व्यक्तिगत श्रेणी म पुरस्कार प्राप्त होइस। आदि कर्मयोगी अभियान के अंतर्गत मोहला-मानपुर, बालोद, दंतेवाड़ा अऊ धमतरी जिला मन ल ‘स्क्रीन फेलिसिटेशन अवार्ड’ मिलीस, जेन ए बात के प्रमाण हे के जनजातीय सेवा अऊ प्रशिक्षण कार्यक्रम मन ल राज्य के हर एक जिला म प्रभावी रूप ले लागू करे जात हे। ए मौका धमतरी कलेक्टर श्री अविनाश मिश्रा, कोरिया कलेक्टर श्रीमती चंदन संजय त्रिपाठी, बालोद कलेक्टर श्रीमती दिव्या मिश्रा अऊ दंतेवाड़ा कलेक्टर श्री कुणाल दुदावत उपस्थित रहिन।
आदिम जाति विकास मंत्री श्री राम विचार नेताम ह ए उपलब्धि म पूरा विभाग ल हार्दिक बधाई दीन। उमन कहिन के मुख्यमंत्री श्री विष्णुदेव साय के अगुवई म जनजातीय विकास विभाग ह जन-कल्याणकारी योजना मन ल धरातल म सफलतापूर्वक लागू करे हे। उमन कहिन के “ये पुरस्कार हमार अधिकारी, फील्ड कर्मचारी अऊ उन जनप्रतिनिधि मन के मेहनत के परिणाम हे, जेन राज्य के दूरस्थ अंचल तक योजना मन के अंजोर पहुँचाए म दिन-रात जुटे हें।”
जानबा हे के छत्तीसगढ़ ह हाल के बछर म जनजातीय शिक्षा, कौशल विकास, स्वास्थ्य अऊ प्रशिक्षण के क्षेत्र म कई अभिनव कदम उठाए हे। आदि कर्मयोगी अभियान ह प्रशासनिक दक्षता ल नवा दिशा देहे हे, उहें पीएम जनमन योजना ह आदिवासी समाज के जीवन स्तर म उल्लेखनीय सुधार लाए हे। ए राष्ट्रीय सम्मेलन म देशभर के जनजातीय कल्याण विभाग मन के अधिकारी, परियोजना निदेशक, विकास सहयोगी संस्था अऊ जनजातीय प्रतिनिधि बड़ संख्या म सामिल होइन।