पेवर ब्लॉक ले आर्थिक मजबूती के अपन रद्दा बनात हें जनकपुर के महिला मन

• मात्र डेढ़ महिना म सुविधा समूह के 12 महिला मन ह मिलके बनाइन 28 हजार पेवर ब्लॉक, 22 हजार ब्लॉक बेचिन, आमदनी होइस 3.52 लाख अऊ मुनाफ़ा एक लाख

कोरिया, कोरिया जिला के जनकपुर विकासखण्ड के महिला मन गौठान म आजीविका के रूप म पेवर ब्लॉक बनावत हें। घरेलू काम-काज करईया ये महिला मन आज सफलता के नवा कहिनी लिखत हें। डेढ़े महिना म सुविधा समूह के 12 महिला मन ह मिलके 28 हजार पेवर ब्लॉक बना डरे हें। जेमां ले 16 रूपिया प्रति ब्लॉक के दर ले 22 हजार ब्लॉक के बेंचे हें। बेचे गए पेवर ब्लॉक के कीमत 3 लाख 52 हजार रुपिया म ले समूह ल 1 लाख के मुनाफा होय हे।
पेवर ब्लॉक बनइया सुविधा स्व-सहायता समूह के अध्यक्ष श्रीमती नीलिमा चतुर्वेदी बताथे कि समूह के 12 महिला मन जनकपुर गौठान म पेवर ब्लॉक बनाए के काम करत हें। समूह ल बिहान कोति ले पेवर ब्लॉक निर्माण के प्रेरणा मिलीस अउ राष्ट्रीय ग्रामीण आजीविका मिशन के अंतर्गत प्रशिक्षण के बाद हमन ये काम चालू करेन। ब्लॉक बनाए बर जरूरी कच्चा माल सीमेंट, गिट्टी, रेती कहूं मिल जाथे। बाकी के समान मन म हार्डनर इलाहाबाद, ब्लॉक बर साँचा कानपुर ले अउ वाइब्रेटर अऊ मिक्सर कोरबा जिला ले मंगवाए गीस।
समूह के बनाये गए पेवर ब्लॉक ले ग्राम नेरुआ, देवगढ़, हरचौका, डोंगरीपारा अऊ सिंगरौली म बनत हे पहुंच मार्ग
महिला मन के बनाय पेवर ब्लॉक के माध्यम ले मुख्य सड़क ले निरधारित स्थल तक पहुंचे बर 200 मीटर लंबाई तक के पेवमेंट ब्लॉक पहुंच मार्ग के निर्माण करे जात हे। अभी हाल म विकासखण्ड जनकपुर के ग्राम पंचायत नेरूआ म पहुंच मार्ग बनाए गए हे। उहें ग्राम देवगढ़, हरचौका, डोंगरीपारा, सिंगरौली म घलोक पेवर ब्लॉक ले पेवमेंट बनाए जात हे। जेखर खातिर कुल 30 हज़ार पेवर ब्लॉक के आर्डर समूह ल मिले हे।