सतर्कता के शुरुआत अपन आप ले होथे – श्री पी. दयानन्द

मुख्यमंत्री के सचिव श्री पी दयानंद के हाथ ले एसईसीएल म तीन महिना के निवारक सतर्कता अभियान के शुभारंभ
सीएमडी एसईसीएल श्री हरीश दुहन ह केंद्रीय सतर्कता आयोग के दिशानिर्देश मन के पूरा पालन करे के करिन आह्वान
रायपुर, एसईसीएल मुख्यालय बिलासपुर म केंद्रीय सतर्कता आयोग, नई दिल्ली के हुकुम के मुताबिक तीन महिना के निवारक सतर्कता (Preventive Vigilance) अभियान के शुभारंभ करे गीस। ए बेरा म मुख्य अतिथि के रूप म मुख्यमंत्री के सचिव श्री पी. दयानन्द उपस्थित रहिन।
कार्यक्रम के अध्यक्षता एसईसीएल सीएमडी श्री हरीश दुहन ह करिन। ए बेरा म श्री सुनील जैन, आयुक्त, बिलासपुर संभाग; एसईसीएल निदेशक (तकनीकी – संचालन सह योजना/परियोजना) श्री एन. फ्रैंकलिन जयकुमार; निदेशक (मानव संसाधन) श्री बिरंची दास अऊ मुख्य सतर्कता अधिकारी श्री हिमांशु जैन के विशिष्ट उपस्थिति रहिस।
कार्यक्रम के शुरुआत दीया बार के होइस। एखर पाछू पहुना मन ह सरदार वल्लभभाई पटेल के फोटू म माला चढ़ा के ओ मन ल नमन करिन। तेखर पाछू कोल इंडिया कॉर्पोरेट गीत प्रस्तुत करे गीस। एखर बाद सीएमडी एसईसीएल श्री हरीश दुहन ह सबो उपस्थित मन ल सत्यनिष्ठा के किरिया खवाईन।
मुख्य अतिथि श्री पी. दयानन्द ह कहिन के सार्वजनिक क्षेत्र म चाहे पीएसयू होवय या राज्य शासन, पारदर्शिता बहुत जरूरी हे। ए प्रकार के आयोजन निश्चित रूप ले सतर्कता अऊ पारदर्शी कार्यसंस्कृति ल बढ़ावा देथे। उमन कहिन के सार्वजनिक क्षेत्र के उपक्रम अऊ राज्य शासन दुनों एक-दूसरे के पूरक हे अऊ क्षेत्र के विकास बर दुनों के बीच आपसी सहयोग अऊ समन्वय बहुत जरूरी हे।
कार्यक्रम के अध्यक्षता करत एसईसीएल सीएमडी श्री हरीश दुहन ह कहिन के मैं टीम एसईसीएल के हर एक सदस्य ले ये आह्वान करना चाहत हंव के हम जेन काम करबो, नियम अऊ नीति के दायरा म रहिके पूरा ईमानदारी अऊ सत्यनिष्ठा के संग करबो।
राज्य शासन के प्रति आभार व्यक्त करत उमन कहिन के एसईसीएल ल अपन कार्यसंचालन ल बेहतर बनाए बर राज्य शासन ले सरलग मार्गदर्शन अऊ सहयोग प्राप्त होत रहिथे। एकरे परिणाम हे के ए साल हम मेगा प्रोजेक्ट्स म भू-अधिग्रहण के प्रक्रिया म गति ला पाए हन। ए बेरा म उमन भू-अधिग्रहण अऊ आन क्षेत्र मन म राज्य शासन ले वांछित सहयोग ले संबंधित विषय म घलोक चर्चा करिन।