जगदलपुर, विश्व प्रसिद्ध बस्तर दशहरा तिहार म संघरे बर जगदलपुर पहुंचे प्रदेश के मुख्यमंत्री श्री भूपेश बघेल ह बस्तर के नगर वासी मन ल दलपत सागर आईलैंड के भंडार छोड़ म 1 करोड़ 92 लाख रूपिया के लागत ले बनाय गए पाथवे, पेंटिंग अऊ विद्युतीकरण काम अऊ 76 लाख रूपिया के लागत ले करे गए सौन्दर्यीकरण काम के लोकार्पण करिन। उहें दलपत सागर आईलैंड म ही 13 लाख 60 हजार रूपिया के लागत ले दलपत सागर के भंडार छोर म दुकान बनवाए के काम के भूमिपूजन घलोक करिन।
मुख्यमंत्री श्री बघेल ह अमृत मिशन योजना अंतर्गत इंद्रावती नदी ले 75 एच पी विटी पम्प ले दलपत सागर के जलस्तर के अनुरक्षण योजना के शुभारंभ बटन दबाके करिन जेखर से दलपत सागर म अब इंद्रावती नदी के पानी पहुंचे लगे हे। दलपत सागर ल संरक्षित करे के दिशा म उठाए गए ये कदम के तहत इन्द्रावती नदी के बहत साफ पानी ल दलपत सागर म भरे के ये उदीम करे गए हे। एखर तहत पावर हाऊस चौक म जल आवर्धन योजना के तहत स्थापित इंटेकवेल म 75-75 एचपी के दू पम्प स्थापित करे गए हे अऊ 400 मिलीमीटर व्यास के 700 मीटर पाइप लाईन के माध्यम ले इन्द्रावती नदी के पानी दलपत सागर म पहुंचाए जात हे।
जानबा हे कि ऐतिहासिक दलपत सागर जलकुंभी के सेती न केवल अपन सुंदरता गंवात रहिस, भलुक ये अपन अस्तित्व घलोक खोवत रहिस। दलपत सागर के अस्तित्व ल बचाय के संगेच एखर सुंदरता ल निखारे बर बस्तर जिला प्रशासन अऊ नगर निगम कोति ले सरलग काम करे जात हे। घरेलू उपयोग म अवइया जल के बड़का मात्रा इहां पहुंचे के सेती दलपत सागर म जलकुंभी अड़बड़ अकन पनप गए रहिस। ये जलकुंभी ल निकाले बर प्रशासन अऊ सामुदायिक प्रयास करे खातिर जलकुंभी ल निकाले बर जिला प्रशासन कोति ले नगर निगम ल 75 लाख रूपिया के लागत ले एक मशीन घलोक देहे रहिस हे, जेखर उपयोग ले दलपत सागर अब बनेच साफ दिखत हे। उहें दलपत सागर म जलकुंभी फेर झन पनपे, एखर खातिर दलपत सागर म अवइया दूषित जल ल रोके के कार्यवाही घलोक करे जात हे। दूषित जल ल इहां आए ले रोके म दलपत सागर म होवइया जल स्तर के कमी ल देखत इन्द्रावती नदी के साफ पानी ले भरे के उदीम करे गीस।
बचाए रहिबो दलपत सागर के मान ये हे बस्तर के शान: दाऊ भूपेश बघेल
