नवा राष्ट्रीय शिक्षा नीति के तहत आदिवासी समुदाय मन म शिक्षा के पहुंच बढ़ाय खातिर महत्वपूर्ण कदम
18 स्थानीय भाषा-बोली मन म स्कूली लइका मन के पुस्तक करे जात हे तैयार
पहिली चरण म छत्तीसगढ़ी, सरगुजिहा, हल्बी, सादरी, गोंडी अऊ कुडुख म कोर्स होही तैयार
नई दिल्ली, 7 जुलाई 2024। छत्तीसगढ़ के आदिवासी अंचल के लइका स्थानीय बोली अउ भाखा म अब जल्दीच पढ़ाई कर सकहीं। नवा राष्ट्रीय शिक्षा नीति ल ध्यान म रखत विष्णुदेव सरकार ह महत्वपूर्ण कदम उठाए हे। एखर तहत सरकार आदिवासी अंचल म लइका मन ल उंखर स्थानीय बोली अऊ भाखा म शिक्षा देहे के पहल शुरू करत हे। एकर उद्देश्य आदिवासी समुदाय मन म शिक्षा के पहुंच अऊ गुणवत्ता ल बढ़ाना हे, जेखर से लइका अपन महतारी भाषा म शिक्षा प्राप्त कर सकयं अऊ अपन संस्कृति ले जुड़े रहयं।
लइका मन ल शिक्षा के प्रति प्रोत्साहित करे अऊ ओ मन ल स्कूल म नामांकन बर प्रेरित करे बर नवा शैक्षणिक सत्र के शुरुआत म शाला प्रवेशोत्सव मनाए जात हे। ए पईत राज्य स्तरीय शाला प्रवेशोत्सव के शुभारंभ छत्तीसगढ़ के दूरस्थ आदिवासी जिला जशपुर के बगिया गांव ले करे गीस। राजधानी रायपुर ले हट के ए आदिवासी बहुल क्षेत्र म आयोजित ए कार्यक्रम ह राज्य के सुदूर कोना तक गुणवत्तापूर्ण शिक्षा पहुंचाए के प्रतिबद्धता ल दर्शाथे।
कार्यक्रम म मुख्यमंत्री ह स्थानीय भाषा मन म प्रारंभिक शिक्षा के महत्व उपर जोर देवत कहिन के एखर से लइका मन के समझ अऊ सीखे के प्रक्रिया म सुधार होही। उहें, ये पहल स्थानीय संस्कृति अऊ परंपरा मन के संरक्षण म घलोक मददगार होही। ए पहल के तहत पाठ्यपुस्तक अऊ शिक्षण सामाग्री मन ल स्थानीय बोली मन म अनुवाद करे जाही अऊ शिक्षक मन ल घलोक ए भाषा मन म प्रशिक्षित करे जाही।
स्कूल शिक्षा सचिव श्री सिद्धार्थ कोमल परदेशी ह बताइस के छत्तीसगढ़ म 18 स्थानीय भाषा-बोली मन म स्कूली लइका मन के पुस्तक तैयार करे जात हे। पहिली चरण म छत्तीसगढ़ी, सरगुजिहा, हल्बी, सादरी, गोंडी अऊ कुडुख म कोर्स तैयार होही। एखर बर प्रदेशभर के साहित्यकार, लोक कलाकार, संकलनकर्ता मन के मदद लेहे जाही। एखर अलावा वरिष्ठ नागरिक अऊ शिक्षक मन ले घलोक सहयोग ले जाही।
हाई स्कूल बगिया के प्रधानाचार्य दिनेश शर्मा ह ए पहल ल सहरावत कहिन के आदिवासी लइका मन म प्रतिभा होथे। स्थानीय बोली म शिक्षा ले आदिवासी अंचल के जादा से जादा लइका मन ल आगू बढ़े के मौका मिलही।
राज्य स्तरीय शाला प्रवेशोत्सव के समय मुख्यमंत्री ह जशपुर के सरकारी स्कूल के अटल टिंकरिंग लैब म रोबोटिक्स मॉडल विकसित करइया छात्र मन के संग बातचीत करत छात्र मन के संग मिट्टी के बर्तन बनाके प्रीवोकेशनल गतिविधि मन म भाग लीन।
ए बेरा म उमन सरकारी स्कूल मन म हर साल गरमी के छुट्टी के बेरा म शिविर आयोजित करे के घलोक घोषणा करिन। एखर संगेच मुख्यमंत्री ह कहिन के 10वीं अऊ 12वीं कक्षा के छात्र मन बर राज्य सरकार ए साल ले दू बोर्ड परीक्षा आयोजित करही। उहें, मुख्यमंत्री ह बताइस पीएमश्री के तहत राज्य म पहिली चरण म 211 स्कूल मन ल मॉडल स्कूल के रूप म विकसित करे जात हे।
