- छात्र-छात्रा मन के खाता म डारे जाही 8 करोड़ 53 लाख रूपिया ले जादा के रकम
- शिक्षा प्रोत्साहन योजना म कक्षा 10वीं अऊ 12वीं म 75 प्रतिशत या ओखर ले जादा नम्बर ले पास प्रतिभाशाली विद्यार्थी ल देहे जाही 8 करोड़ रूपिया ले जादा के रकम
- मेधावी छात्र-छात्रा पुरस्कार योजना म पढ़ईया लईका मन ल देहे जाही 75 लाख रूपिया ले जादा के प्रोत्साहन राशि
रायपुर, 18 नवम्बर 2020। मुख्यमंत्री श्री भूपेश बघेल ह काली 19 नवम्बर के अपन घर के कार्यालय म आयोजित वर्चुअल कार्यक्रम म प्रदेश के तेंदूपत्ता सकेलईया मनखे मन के प्रतिभाशाली लइका मन ल शिक्षा प्रोत्साहन राशि ऑनलाइन बांटहीं। मुख्यमंत्री श्री बघेल वन विभाग कोति ले संचालित शिक्षा प्रोत्साहन योजना अऊ मेधावी छात्र-छात्रा मन ल पुरस्कार योजना के तहत कुल 4 हजार मेधावी पढ़ईया लईका मन के खाता म 8 करोड़ 53 लाख 2 हजार रूपिया के रकम डारहीं।
शिक्षा प्रोत्साहन योजना के अंतर्गत शैक्षणिक साल 2019-20 म कक्षा 10वीं अऊ 12वीं के परीक्षा म 75 प्रतिशत या ओखर से जादा नम्बर लवइया तेंदूपत्ता सकेलईया मनखे मन के प्रतिभाशाली लइका मन के खाता म 8 करोड़ 4 लाख 10 हजार रूपिया के राशि डारहीं। ये योजना म कक्षा 10वीं पास करईया छात्र-छात्रा मन ल 15 हजार रूपिया अऊ कक्षा 12वीं पास करइया छात्र-छात्रा मन ल 25 हजार रूपिया शिक्षा प्रोत्साहन योजना के अंतर्गत दे जात हे।
अइसनहे मेधावी छात्र-छात्रा मन ल पुरस्कार योजना के तहत शैक्षणिक साल 2019-20 बर छात्र-छात्रा मन के खाता म 75 लाख 4 हजार 500 रूपिया के राशि डारे जाही। ये योजना म हरे क प्राथमिक वनोपज समिति क्षेत्र म हर एक साल कक्षा 8वीं म सबले जादा नम्बर लवइया तेंदूपत्ता संग्राहक परिवार के मेधावी छात्र-छात्रा मन ल पुरस्कार के तहत 2000 रूपिया, कक्षा 10वीं म सबले जादा नम्बर लवइया विद्यार्थी ल 2500 रूपिया अऊ कक्षा 12वीं म सबसे जादा नम्बर लवइया विद्यार्थी ल 3000 रूपिया के पुरस्कार राशि देहे जाथे। ये पुरस्कार प्राथमिक वनोपज समिति क्षेत्र के अंतर्गत एक छात्र अऊ एक छात्रा ल प्रदान करे जात हे।
