जशपुर, जिला के विकासखंड बगीचा स्थित प्राथमिक विद्यालय बेलडेगी ह लइका मन के थाली तक ताजा अऊ स्वास्थ्यवर्धक पोषक तत्व पहुँचाए के अनोखा पहल करे हे। अब इहां मिड-डे मील म परोसे जात साग सीधा स्कूल परिसर के किचन गार्डन ले आत हे, जेला लइका अऊ गुरूजी मिलके उगात हें।
प्रधान पाठक अल्फा किरण मिंज अऊ गुरूजी मुनु राम के मार्गदर्शन म स्कूल परिसर म तियार ए बागान म भिंडी, टमाटर, बैंगन, पालक, धनिया, लहसुन अऊ मटर जइसे हरीयर साग उगाए जात हे। एखर से पहिली लइका लौकी, कद्दू, करेला अऊ तरोई जइसे ताजा साग-भाजी के घलोक स्वाद लेहे हें। स्कूल के गुरूजी अऊ पढ़ईया लईका मन ह मिलके ए बगिया ल सजाए-संवारे हें। उहें पंचायत कोति ले लगाए गए सबमर्सिबल पंप ह सिंचाई के सुविधा उपलब्ध करात हे।
ब्लॉक शिक्षा अधिकारी सुदर्शन पटेल ह कहिस के बेलडेगी स्कूल ह ये साबित कर देहे हे के कहूं संकल्प अऊ सामूहिक प्रयास होही, त सरकारी योजना मन ल अऊ प्रभावी बनाय जा सकत हे। लइका मन ल न केवल ताजा, पोषक अऊ शुद्ध साग मिलत हे बल्कि ओ मन खेती-बाड़ी अऊ श्रम के महत्व घलोक सीखत हें। ये पहल पूरा ब्लॉक बर मॉडल बन गे हे।
ए उदीम ले बेलडेगी स्कूल अब सिरिफ पढ़ाई म ही न ही, बल्कि लइका मन के स्वास्थ्य अऊ आत्मनिर्भरता के क्षेत्र म घलोक मिसाल कायम करत हे।
बेलडेगी स्कूल के लइका अपन उपजाए साग खावत हें मिड-डे मील म
