कुदरती बिपति ले गेहूँ के फसल खराब होए मा मिलिस 24 हजार के बीमा दावा
मनेन्द्रगढ़-चिरमिरी-भरतपुर, खेती-किसानी पूरा कुदरत ऊपर भरोसा मा चलथे अउ मौसम के कोनो ठिकाना नइ रहे ले कइ पइत किसान मन के कइ बछर के मेहनत मा पानी फिर जाथे। असन कठिन समय मा प्रधानमंत्री फसल बीमा योजना ह किसान मन बर आर्थिक सुरक्षा कवच बनके सोझ आवत हे। मनेन्द्रगढ़-चिरमिरी-भरतपुर जिला के विकासखंड मनेन्द्रगढ़ के अंतर्गत ग्राम पसौरी के रहइया किसान अजमेर सिंह के कहानी ए योजना के उपयोगिता ला साफ तौर ले देखाथे।
अजमेर सिंह ह अपन लगभग 4 एकड़ खेती भुइयां मा गेहूँ के फसल बोए रहिस। खेती के संगे-संग ओ ह समझदारी देखावत प्रधानमंत्री फसल बीमा योजना के अंतर्गत अपन फसल के बीमा घलो कराए रहिस। फसल तियार होए के पहिली कुदरती कारन मन ले ओकर गेहूँ के फसल ला भारी नुकसान पहुँचिस, जेकर से ओला आर्थिक परेशानी के सामना करे बर परिस।
फसल खराब होए के बाद ओ ह प्रधानमंत्री फसल बीमा योजना के तहत तय प्रक्रिया के अनुसार बीमा दावा पेस करिस। जुड़े अधिकारी मन डहर ले दावा के जाँच करे के बाद बीमा कंपनी ह ओला 24,000 रुपिया के सहायता रासि मंजूर करके दीस। ए रासि ओकर बर बड़का सहारा साबित होइस अउ खेती ले जुड़े नुकसान के भरपाई मा भारी मदद मिलिस।
अजमेर सिंह बताथे के कहूं ओ ह फसल के बीमा नइ कराए रतिस त नुकसान के भरपाई करना बहुते कठिन हो जतिस। ओकर कहना हे के प्रधानमंत्री फसल बीमा योजना किसान मन बर कठिन बखत मा एकठन मजबूत सुरक्षा कवच के काम करथे। योजना के माध्यम ले मिलइया आर्थिक सहायता किसान मन ला दोबारा खेती करे के भरोसा देवत हे अउ ओमन ला बिपति ले उबरे मा मदद करथे।
ओ ह जिला के जम्मो किसान मन ले अरजी करिस के ओमन अपन फसल मन के समय मा प्रधानमंत्री फसल बीमा योजना के अंतर्गत बीमा जरूर करवावंय, ताकि कुदरती बिपति, जादा पानी गिरे, सुखा, ओला गिरे या आन कारन मन ले फसल ला नुकसान होए मा ओमन ला घलो योजना के लाभ मिल सकय अउ आर्थिक संकट के सामना नइ करे बर परय।
अजमेर सिंह ह किसान मन के हित मा चलाए जात ए महत्वाकांक्षी योजना बर प्रधानमंत्री श्री नरेंद्र मोदी के आभार जताइस। संग मा ओ ह छत्तीसगढ़ के मुख्यमंत्री श्री विष्णु देव साय के किसान हितैषी उदीम मन अउ कृषि क्षेत्र के विकास बर करे जात काम मन बर घलो धन्यवाद दीस।
प्रधानमंत्री फसल बीमा योजना आज किसान मन बर सिरिफ बीमा योजना नो हे, भलुक बिपति के बखत मा आर्थिक सुरक्षा अउ बिसास के मजबूत आधार बनके उभरत हे।
