प्रधानमंत्री आवास योजना ले खुद के पक्का मकान मिले ले खुश हें मनखे

रायपुर, मुख्यमंत्री श्री विष्णु देव साय के अगुवइ म छत्तीसगढ़ शासन के योजना मन के लाभ अब समाज के आखरी मनखे तक पहुँचत हे। प्रधानमंत्री आवास योजना ले दूरस्थ अंचल मन के मनखे मन ल लाभान्वित करे जात हे अऊ हितग्राही अब अपन खुद के मकान म सुकुन ले जीवन व्यतीत करत हें। मिले जानकारी के मुताबिक जशपुर जिला म करीब 74 हजार 346 मकान पूरा हो गे हे।
जशपुर जिला के दुलदुला विकासखंड के ग्राम खटंगा के एक परिवार के कहानी एकर जीवंत उदाहरण है जेमां शासन के तीन योजना मन ह एक संग उंखर ज़िंदगी ल नवा दिशा देहे हे।
सुरेशराम के पत्नी श्रीमती सुमित्रा बाई बताथे, के पहिली हम कच्चा घर म रहत रहेन। बरसात हो या गर्मी हमेशा डर बने रहय। पानी चूहय अउ भिथिया गिरे के डर रहय अऊ रात-बिरात साँप, बिच्छू के डर अलग रहय। फेर प्रधानमंत्री आवास योजना ले मिले पक्का घर अब हमार बर एक नवा दुनिया जइसे हे। अब न डर हे नइ परेशानी घर घलोक साफ-सुथरा हे अऊ लइका मन ल पढ़े-लिखे के घलोक अच्छा माहौल मिलत हे।
वोखर बेटी कुमारी संगीता बताथे, जब कच्चा घर रहिस तब हम पढ़ई घलोक ठीक से नइ कर पात रहेन। बरसात के दिन बहुत दिक्कत होत रहिस। अब जब पक्का घर मिले हे त मन लगथे। हम अब बहुत खुश हन।
सुमित्रा बाई आगू बताथे के प्रधानमंत्री उज्ज्वला योजना ले गैस सिलेंडर अऊ चूल्हा मिले ले अब हम धुँआरहित खाना बना पात हन। पहिली जंगल ले लकड़ी लाना परत रहिस आगी जलाना मुश्किल रहय। धुंगिया म आँखी म जलन खाँसी अऊ समय घलोक जादा लगत रहिस। अब रसोई म आसानी ले खाना  बनथे।
उमन आगू बताइन के मोला मुख्यमंत्री महतारी वंदन योजना के तहत हर महीना एक हजार रूपिया मिलथे। वोकरे से हम तेल, नमक, साबुन जइसे ज़रूरी सामान बिसाथन। कभू बेटी ल स्कूल बर कॉपी-किताब घलोक लेना होथे त वोकरे से काम चल जाथे। परिवार ह मुख्यमंत्री श्री विष्णु देव साय के आभार जताए हे।