प्रधानमंत्री आवास योजना ले स्व सहायता समूह के महिला मन ल मिलीस रोजगार 465 महिला मन बनिन लखपति दीदी

सरगुजा, प्रधानमंत्री आवास योजना ग्रामीण न केवल जरूरतमंद मनखे मन ल पक्का मकान देहे म सफल रहे हे, बल्कि ए योजना ह ग्रामीण अर्थव्यवस्था अऊ महिला सशक्तिकरण ल घलोक नवा दिशा देहे हे। योजना के तहत आज लाखों परिवार मन ल ऊंखर सपना के आशियाना मिल चुके हे, जिहां ओ मन सुरक्षित अऊ सम्मानपूर्वक जीवन बितावत हें।
ए योजना के एक विशेष उपलब्धि ये रहे हे के एखर माध्यम ले महिला मन ल स्वरोजगार के अवसर मिले हे। सरगुजा जिला म बड़ संख्या म स्व सहायता समूह के महिला मन प्रधानमंत्री आवास योजना ले जुड़के निर्माण सामान के आपूर्ति म सक्रिय भूमिका निभावत हें। ए महिला मन ह समूह मन ले करजा लेके ईंट, सीमेंट, गिट्टी, छड़, सेंटरिंग प्लेट्स अऊ मिक्सर मशीन जइसे निर्माण सामान हितग्राही मन ल उपलब्ध करावत हें।
ईंट निर्माण के क्षेत्र म 281 दीदी मन ह सक्रिय भागीदारी निभाए हें, जिंकर बनाय ईंटा के उपयोग घर निर्माण म करे गीस। उहें 413 दीदी मन ह बैंक लिंकेज अऊ समूह करजा के माध्यम ले सेंट्रिंग प्लेट्स किराया म देहे के व्यवसाय शुरू करे हें। कुछ महिला मन ह अपन परिवार के सहयोग अऊ करजा राशि के मदद ले सीमेंट मिक्सर मशीन बिसाए हें अऊ ओ मन ल किराया म लगाए हें। संगे कुछ दीदी मन ह सीमेंट, गिट्टी अऊ छड़ जइसे सामान घलोक गांव पंचायत स्तर म उपलब्ध करात हें, जेखर से हितग्राही मन ल स्थानीय स्तर म ही निर्माण बर जरूरी सामान प्राप्त होवत हे।
ए गतिविधि मन ले महिला मन के आय म सरलग बढ़ोतरी होवत हे अऊ ओ मन आर्थिक रूप ले आत्मनिर्भर बनत हें। एकर परिणाम ये है के जिला के कुल 465 महिला मन अब ‘लखपति दीदी क्लब’ म सामिल हो गे हें। ए महिला मन ह बताइन के प्रधानमंत्री आवास योजना ह ऊंखर जीवन म नवा अंजोर लाए हे अऊ ओ मन ल आर्थिक रूप ले सशक्त बनाए के अवसर प्रदान करे हे। महिला मन ह ए उपलब्धि बर प्रधानमंत्री श्री नरेंद्र मोदी अऊ मुख्यमंत्री श्री विष्णु देव साय के प्रति आभार प्रकट करत कहिन के ये योजना ऊंखर बर केवल एक आवास योजना न ही, बल्कि आत्मनिर्भरता अऊ सम्मानपूर्ण जीवन जीए के रद्दा हे।