योजना के तहत जिला के विशेष पिछड़ी जनजाति सदस्य मन के बनत हे पक्का मकान
जिला म अभी तक पीएम जनमन अंतर्गत दू हजार 494 घर पास
गरियाबंद, 10 जुलाई 2024। प्रधानमंत्री जनमन योजना के माध्यम ले विशेष पिछड़ी जनजाति सदस्य मन ल कई प्रकार के शासकीय योजना मन ले लाभान्वित करे जात हे। एही कड़ी म जिला के पीवीटीजी परिवार मन ल घर के सुविधा प्रदान करे जात हे। ए प्रकार पीएम जनमन आवास योजना लाभार्थी मन के जीवन म न केवल सुधार ला वत हे, भलुक पक्का मकान के सपना ल साकार करे के अवसर घलोक प्रदान करत हे। ए योजना ले ग्रामीण क्षेत्र मन म विकास के एक नवा दिशा मिलत हे, जेखर से समाज के पिछड़े वर्ग ल ऊपर लाय के काम करे जात हे। विशेष पिछड़ी जनजाति सदस्य मन के हर एक मनखे के सिर म एक पक्का छत होवय अऊ ओखर जीवन सुकून ले भरे होवय, इही पीएम जनमन आवास योजना के उद्देश्य हे। योजना अंतर्गत जिला म अभी तक दू हजार 494 घर पीवीटीजी परिवार मन बर स्वीकृत करे जा चुके हे। परिवार मन बर घर बनाए बर किश्त के राशि घलोक जारी करे जात हे। जेखर से मकान बनाए के काम तेजी ले चलत हे। फलस्वरूप घर के काम समय अवधि म पूरा होवत हे। संगेच हितग्राही मन ल घर निर्माण अवधि म मनरेगा के माध्यम ले दैनिक रोजी पाय के घलोक सुविधा मिलत हे। एखर अलावा घर के संग नल जल कनेक्शन, बिजली कनेक्शन अउ स्वच्छ भारत मिशन के तहत शौचालय बनाए के घलोक सुविधा मिलत हे।
पीएम जनमन आवास योजना अंतर्गत पक्का मकान के सुविधा पवईया ग्राम सोहागपुर के मिलउ अउ पुरन, देवगांव के रमेश कुमार कमार अउ तुहामेटा के इतवारीन ह बताइस के हर एक नागरिक के सपना होथे के ओखर अपन एक पक्का मकान होवय, जेमां वो अपन परिवार के संग हरहिंछा जीवन यापन कर सकय।
फेर आर्थिक स्थिति के सेती हर कोइ के ये सपना साकार नइ हो पाए। गरीब असहाय के सपना ल साकार करे बर प्रधानमंत्री जनमन आवास योजना वरदान साबित होवत हे। एखर बर हम परिवार संग प्रधानमंत्री जी अउ मुख्यमंत्री जी के प्रति आभार व्यक्त करत हन। लाभार्थी मन ह बताइस कि पहिली अपन पुश्तैनी कच्चा घर म रहत रहेन। बरसात के मौसम म ओ मन ल कई समस्या के सामना करना परत रहिस। कच्चा घर म सांप बिच्छी के आए के खतरा अऊ कच्चा मकान के छत ले पानी टपके के घलोक अंदेशा बने रहय। प्रधानमंत्री जनमन आवास योजना के अंतर्गत साल 2023-24 म पक्का घर बनाए बर स्वीकृति प्रदान करे गीस। शासन ले अनुदान म मिले राशि ले अपन पक्का मकान बनाके अब वो अपन परिवार के संग पक्का मकान म रहत हे।
