पिंकी मुद्रा लोन ले बनिस आत्मनिर्भर
जशपुर, पिंकी ह अपन किराना व्यवसाय ल आगू बढ़ाए के सपना देखिस। ए सपना ल साकार करे बर वो ह पीएम मुद्रा लोन के तहत 70 हजार रूपिया के स्वयंसिद्धा लोन लीस अऊ अपन दुकान ल बढ़ाइस। दुकान बाढ़े ले वोखर आय बाढ़ीस, संगेच ग्राहक मन के विश्वास अऊ पहुँच घलोक मजबूत होइस अऊ वो आर्थिक विकास के संग आत्मनिर्भर बन गे।
प्रधानमंत्री मुद्रा लोन योजना ह महिला मन ल आर्थिक रूप ले सशक्त बनाए बर एक नवा भरोसा जगाए हे। ए योजना के संग महिला मन ल वित्तीय सहायता देहे जात हे, जेखर से ओ अपन व्यवसाय के शुरुआत करके अपन पांव म खड़े होवत हे। जशपुर जिला के मनोरा विकासखंड के ग्राम पंचायत मनोरा के रहइया श्रीमती पिंकी सोनी बिहान महिला स्व-सहायता समूह ले जुड़े हे। समूह ले जुड़े के बाद ओ मन ल शासन के योजना मन के जानकारी मिलीस अऊ आर्थिक आत्मनिर्भरता के दिशा म कदम बढ़ाए के अवसर प्राप्त होइस।
पिंकी सोनी बताइस के “समूह ले जुड़े के बाद मोर जीवन म सकारात्मक बदलाव आए हे। छत्तीसगढ़ शासन के योजना मन के जानकारी मिलीस अऊ आत्मनिर्भर बने के आत्मविश्वास घलोक हासिल होइस।” प्रधानमंत्री मुद्रा लोन योजना के उद्देश्य स्व सहायता समूह मन ले जुड़े महिला मन ल आत्मनिर्भर बनाना हे। ये योजना स्व सहायता समूह मन ले जुड़े महिला मन ल कम ब्याज दर म करजा उपलब्ध कराके सक्षम बनाना हे।
प्रधानमंत्री मुद्रा लोन योजना ले बदलत हे ग्रामीण महिला मन के जिंदगी
