प्रधानमंत्री सुरुज घर मुफ्त बिजली योजना ह बदलिस ग्रामीण परिवार के किस्मत

रानीसागर के लक्ष्मीकांत बनिस ऊर्जा उत्पादक
रायगढ़, प्रधानमंत्री सुरुज घर मुफ्त बिजली योजना के प्रभावी क्रियान्वयन ले रायगढ़ जिला म स्वच्छ ऊर्जा के प्रति जनजागरूकता बाढ़े हे अऊ ग्रामीण परिवार आत्मनिर्भरता के दिशा म अग्रसर होवत हें। इही कड़ी म खरसिया विकासखंड अंतर्गत ग्राम रानीसागर के रहवइया लक्ष्मीकांत पटेल ह योजना के लाभ उठाके अपन घरेलू बिजली व्यय म कमी लाए हे, संगेच सौर ऊर्जा उत्पादक बनके पूरा गाँव बर प्रेरणास्रोत घलोक बन गे हे।
पटेल के परिवार के मासिक बिजली बिल औसतन 800 ले 920 रूपिया तक आवत रहिस। मार्च 2025 म वो ह प्रधानमंत्री सुरुज घर योजना के तहत 3 किलोवाट क्षमता के रूफटॉप सोलर पैनल स्थापित कराइइय। एखर बाद ओखर मासिक बिजली बिल घटके मात्र 370 रूपिया रहि गे। पाछू तीन महीना म वोखर सोलर संयंत्र ले 780 यूनिट विद्युत के उत्पादन होइस, जेमां ले 530 यूनिट के उपयोग वो ह खुद करिस अऊ बांचे 250 यूनिट विद्युत वितरण कंपनी ल विक्रय करे गीस। एखर एवज म वोखर बिजली खाता म 1020 रूपिया के राशि जमा करे गीस, जेन अवइया बिल म एडजस्ट करे जाही।
ए सोलर प्लांट के कुल लागत म ले पटेल ल मात्र 10 हजार रूपिया के राशि खुद वहन करना परे रहिस। बाकी राशि के वित्तीय प्रबंधन भारतीय स्टेट बैंक ले 6 प्रतिशत वार्षिक ब्याज दर म करे गीस। केंद्र सरकार कोति ले देहे गए अनुदान के बाद वोखर मासिक ईएमआई घलोक बिजली बिल के आधा राशि ले कम रहि हे। लक्ष्मीकांत पटेल के मानना हे के ये योजना दीर्घकालीन रूप ले आम नागरिक मन ल आत्मनिर्भर बनाही। संगे, ये पर्यावरण संरक्षण अऊ घरेलू अर्थव्यवस्था ल सुदृढ़ करे म सहायक सिद्ध होवत हे। वोखर सफलता ले प्रेरित होके अब गाँव के आन नागरिक घलोक योजना ले जुड़े बर उत्साहित हे।