बिजली बिल कम होइस, अब नइ हे मेंटेनेंस के चिंता

छत म पावर जनरेटर बनिस सौर ऊर्जा प्लांट
रायगढ़, छत्तीसगढ़ म प्रधानमंत्री सूर्यघर मुफ्त बिजली योजना के तहत तेजी ले काम होवत हे। ए योजना म जब ले मुख्यमंत्री श्री विष्णु देव साय ह राज्य सरकार कोति ले घलोक तीस हजार रूपिया के सब्सिडी के घोषणा करे हें। तब ले सोलर प्लांट लगवाए बर मनखे तेजी ले आवेदन करत हें। नगर निगम रायगढ़ के लोचन नगर के रहवइया प्रदीप मिश्रा ए महत्वाकांक्षी योजना के लाभ उठाके अपन घर के बिजली खपत म कमी लावत हे, संगेच पर्यावरण संरक्षण म घलोक सराहनीय योगदान देवत हे। अपन घर के छत म सोलर पावर प्लांट लगवाए ले मिश्रा जी के घर के बिजली बिल आधा हो गए हे। एक पइत प्लांट लगे के बाद ओखर रख-रखाव, मरम्मत या मेंटेनेंस के चिंता घलोक नइ हे। 
मिश्रा ह अपन मकान के छत म 3 किलोवाट क्षमता के सोलर रूफटॉप पैनल स्थापित कराए हे। पहिली ओ ल सौर ऊर्जा के बारे म सीमित जानकारी रहिस, फेर बिजली विभाग ले योजना के जानकारी मिले के बाद वो ह विभाग के तकनीकी सहायता ले ये सिसटम लगवाइस। कुल लागत बर वो ह ग्रामीण बैंक ले करजा लीस, जेमां केंद्र सरकार ले 78,000 रूपिया अऊ राज्य सरकार ले 30,000 रूपिया के सब्सिडी मिलीस। वो ह बताइस के सौर पैनल लगवाए के बाद ले वोखर बिजली बिल म कमी आए हे। पहिली हर महिना लगभग 550 यूनिट बिजली के खपत होत रहिस, फेर अगस्त महीना म ये घटके करीब 300 यूनिट रहे के अनुमान हे।
मिश्रा ह कहिस के ए योजना ले आर्थिक बचत होवत हे, संगेच स्वच्छ ऊर्जा के उपयोग करके पर्यावरण प्रदूषण ल घलोक कम करे जा सकत हे। मिश्रा ह जिला के आन नागरिक मन ले घलोक अपील करे हें के ओ मन प्रधानमंत्री सूर्य घर मुफ्त बिजली योजना के लाभ अवश्य लेवंय। योजना के तहत कई ठन क्षमता के सोलर पैनल मन म सरकार कोति ले अलग-अलग सब्सिडी देहे जात हे अऊ बिजली विभाग के मदद ले लउहे स्थापना कराए जात हे। ए योजना के लाभ उपभोक्ता मन ल पूर्णत ऑनलाईन प्रक्रिया के तहत देहे जात हे। जेखर तहत उपभोक्त खुद ऑनलाईन पोर्टल म लॉग इन करके या पीएम सूर्यघर मोबाईल ऐप सीएसपीडीसीएल के वेबसाइट, मोर बिजली एप अऊ बिजली कंपनी के टोल फ्री नंबर 1912 म कॉल कर आवेदन कर सकत हें।