श्रीमती अंजली सिंह ल मिलीस राहत, आधा होइस बिजली बिल
बिलासपुर, प्रधानमंत्री सूर्यघर मुफ्त बिजली योजना पूरा देश के जइसे बिलासपुर जिला के मनखे मन बर घलोक फायदेमंद साबित होवत हे। एखर से न केवल पर्यावरण संरक्षण ल बढ़ावा मिलत हे, बल्कि महंगाई के ए दौर म भारी भरकम बिजली बिल ले घलोक राहत मिलत हे। जिला बिलासपुर के अशोक नगर रहवइया श्रीमती अंजली सिंह ह अपन छत म 3 किलोवाट के सोलर प्लांट स्थापित करे हे। वो ह बताइस के ए सोलर प्लांट के कुल लागत 1 लाख 85 हजार रूपिया आए हे। ये मां ले केंद्र सरकार ले 78 हजार रूपिया के सब्सिडी घलोक मिले हे।
श्रीमती सिंह ह बताइस के सोलर प्लांट लगाय ले पहिली ऊंखर घर के मासिक बिजली बिल ढाई ले 3 हजार तक आवत रहिस, फेर अब ओखर बिजली आधा हो गए हे। एखर से ओ ल आर्थिक रूप ले बड़ राहत मिले हे। वो ह कहिस के प्रधानमंत्री श्री नरेन्द्र मोदी के दूरदर्शी सोच ले अक्षय ऊर्जा ल बढ़ावा अऊ प्राकृतिक संसाधन मन के संरक्षण म महत्वपूर्ण योगदान मिलत हे ए योजना म अब राज्य सरकार घलोक केंद्र सरकार के संग मिलके प्रधानमंत्री सूर्यघर मुफ्त बिजली योजना के उपभोक्ता मन ल लाभ पहुंचावत हे।
मुख्यमंत्री श्री विष्णु देव साय के कैबिनेट ह अक्षय ऊर्जा ल प्रोत्साहन देहे अऊ बिजली उपभोक्ता मन ल राहत पहुंचाए खातिर योजना म 30 हजार रूपिया तक के अकतहा अनुदान देहे के निर्णय लेहे हे। श्रीमती सिंह ह बताइस के पहिली बिजली गोल होए म दिक्कत होत रहिस, घेरी-बेरी शिकायत करना परय। अब ए सब समस्या मन ले छुटकारा मिल गए हे। आवेदन करे के दस दिन के भीतर सेटअप घलोक लग गए रहिस। वो ह योजना बर सरकार ल धन्यवाद देवत कहिस के सोलर सिसटम के रख रखाव अड़बड़ सरल हे अऊ ये मां कोनो अकतहा खर्च नइ आवय। हर मनखे बर एला उपयोगी बतात वो ह ए योजना ले जुड़े ल कहिस।
सरकार ले मिलत हे सब्सिडी –
जानबा हे के ए योजना के तहत स्थापित सोलर रूफटॉप संयंत्र विद्युत ग्रिड ले नेट मीटरिंग के माध्यम ले जोड़े जाथे। उपभोक्ता अपन जरूरत ले जादा बिजली के उत्पादन करके ग्रिड ल सप्लाई कर सकत हे, जेखर से ओखर बिजली बिल शून्य होए के संगे-संग अकतहा आय घलोक प्राप्त होथे। ए योजना के अंतर्गत 1 किलोवाट के सोलर प्लांट स्थापित करे म केंद्र सरकार ले 30 हजार रुपिया अऊ राज्य सरकार ले 15 हजार रुपिया के कुल 45 हजार रुपिया के सब्सिडी मिलथे, 2 किलो वॉट म केंद्र ले 60 हजार अऊ राज्य ले 30 हजार, उहें 3 किलोवाट के सोलर पैनल स्थापित करे म केंद्र सरकार ले 78 हजार रुपिया अऊ राज्य सरकार ले 30 हजार रुपिया कुल 1 लाख 8 हजार रुपिया के अनुदान प्राप्त होथे। प्रधानमंत्री सूर्यघर मुफ्त बिजली योजना के लाभ लेहे बर उपभोक्ता मन ल वेबसाइट या पीएम सूर्यघर मोबाइल ऐप म पंजीयन कराना होही।
