प्रधानमंत्री सूर्यघर मुफ्त बिजली योजना ले ऊर्जा आत्मनिर्भरता के मिसाल बनिस सुनीता लाल, बिजली बिल ले मिलीस छुटकारा

रायपुर, देश ल स्वच्छ, किफायती अऊ नवीकरणीय ऊर्जा कोति अग्रसर करइया केंद्र सरकार के प्रधानमंत्री सूर्यघर मुफ्त बिजली योजना आम जनता के जीवन म क्रांतिकारी बदलाव लावत हे। ए योजना के तहत गौरेला शहर के सुंदर नगर रहवइया श्रीमती सुनीता लाल ह अपन घर म सौर ऊर्जा ल अपनाके आर्थिक बचत करे हे, संगेच पर्यावरण संरक्षण म घलोक महत्वपूर्ण भूमिका निभावत हे। सुनीता लाल ह योजना के तहत अपन मकान के छत म 2 किलोवाट क्षमता के सोलर पैनल स्थापित करवाए हे, एखर बर ओ ल केंद्र सरकार ले 30 हजार रूपिया के सब्सिडी मिले हे। सौर संयत्र लगे ले ओखर बिजली बिल शून्य हो गए हे।
सूर्यघर मुफ्त बिजली योजना के लाभ उठाके सुनीता अपन घरेलू जरूरत के बिजली खुद पैदा करत हे, संगे अकतहा बिजली ल ग्रिड म भेजके क्रेडिट घलोक अर्जित करत हे। एखर से ओ ल आर्थिक, मानसिक अऊ सामाजिक स्तर म राहत मिले हे। ए पहल ले प्रेरित होके सुनीता ह आन नागरिक मन ले घलोक अपील करे हे के ओ मन प्रधानमंत्री सूर्यघर मुफ्त बिजली योजना के लाभ उठावंय अऊ अपन घर ल ऊर्जा आत्मनिर्भर बनावंय। उमन प्रधानमंत्री श्री नरेंद्र मोदी अऊ मुख्यमंत्री श्री विष्णु देव साय के प्रति आभार प्रकट करत कहिन, ये योजना हमार जीवन म सुखद बदलाव लेके आए हे। आज हमर बिजली बिल मुफ्त म परत हे, बल्कि पर्यावरण के रक्षा म घलोक हम अपन योगदान देवत हन।