प्रधानमंत्री सूर्यघर मुफ्त बिजली योजना ले बगरत हे गांव के घर मन म अंजोर

सौर ऊर्जा ले अखराभांठा के घर मन म होइस अंजोर
सक्ती, प्रधानमंत्री सूर्यघर मुफ्त बिजली योजना ह छत्तीसगढ़ के ग्रामीण अऊ शहरी उपभोक्ता मनल ऊर्जा के क्षेत्र म आत्मनिर्भर बने के दिशा म नवा रद्दा देखाए हे।  सक्ती जिला के ग्राम अखराभांठा रहवइया श्री गिरधर देवांगन एकर जीवंत उदाहरण हे, जे ह जून 2025 म अपन घर के छत म 3 किलोवाट क्षमता के रूफटॉप सोलर प्लांट स्थापित करके बिजली के क्षेत्र म आत्मनिर्भरता हासिल करे हे।
श्री देवांगन, जेन पावरलूम काम ले जुड़े हे, ह बताइस के योजना के अंतर्गत ओ ल केंद्र सरकार ले 78,000 रूपिया अऊ राज्य सरकार ले 30,000 रूपिया, कुल 1 लाख 8 हजार रूपिया के सब्सिडी मिलीस। लगभग 2 लाख रूपिया लागत वाले ए सोलर प्लांट ले अब वोखर घर म रोजेच औसतन 40 यूनिट बिजली के उत्पादन होवत हे।
वो ह बताइस के पहिली वोखर घर के बिजली बिल लगभग 5,000 रूपिया आवत रहिस, जेन अब काफी हद तक कम हो गए हे। अतकेच न ही, अकतहा बिजली ग्रिड म सप्लाई होए ले ओ ल आर्थिक लाभ घलोक होवत हे। श्री देवांगन ह कहिस के योजना ह ओ ल बड़का राहत देहे हे अऊ अब ओ अपन पावरलूम कार्यस्थल म घलोक सौर ऊर्जा के उपयोग करे के योजना बनावत हे।
प्रधानमंत्री श्री नरेंद्र मोदी अऊ मुख्यमंत्री श्री विष्णुदेव साय के प्रति आभार व्यक्त करत श्री गिरधर देवांगन ह कहिस के ये योजना सही म उपभोक्ता मन खातिर आत्मनिर्भरता अऊ आर्थिक बचत के मार्ग प्रशस्त करत हे।