बिलासपुर : प्रधानमंत्री सूर्यघर मुफ्त बिजली योजना ले अब बिजली बिल ले मिलत हे राहत

योजना ले कोनी के श्रीमती संगीता तिवारी के घर के बिजली बिल होइस आधा
बिलासपुर, प्रधानमंत्री सुरुज घर मुफ्त बिजली योजना ले बिलासपुर के कोनी निवासी श्रीमती संगीता तिवारी के घर के बिजली बिल आधा ले घलोक कम हो गए हे। ए महत्वपूर्ण योजना के तहत सोलर पैनल लगवाए ले अब ओ ल घर के बिजली बिल ले राहत मिलत हे। ए योजना के संग आम मनखे मन ल बिजली बिल के चिंता ले नइ केवल मुक्ति मिलत हे बल्कि ओ मन ग्रीन एनर्जी ल अपनाके पर्यावरण संरक्षण म घलोक अपन योगदान देवत हें।
बिलासपुर के कोनी स्थित रिवर व्यू कॉलोनी म रहइया श्रीमती संगीता तिवारी के घर म 10 किलो वाट के सोलर पैनल लगे हे, श्रीमती संगीता तिवारी के बहू श्रीमती शालिनी तिवारी ह बताइस के पीएम सुरुज घर-मुफ्त बिजली योजना के तहत वोखर घर के छत म 10 किलोवाट के सोलर पैनल लगवाए गए हे जेकर लागत 5 लाख आए हे। जेमां शासन के कोति ले योजना के तहत 78 हजार रुपिया के सब्सिडी घलोक मिले हे। वो ह बताइस के संयुक्त परिवार होए के सेती वोखर घर म बिजली के खपत बहुत जादा रहिस, वोखर इहां हर महीना ले 8 ले दस हजार रुपिया तक के बिजली बिल आत रहिस। उहें गर्मी के मौसम म बिजली के बिल अड़बड़ बाढ़ जात रहिस। फेर घर के छत म सोलर पैनल लगवाए ले अब बिजली बिल आधा ले घलोक कम हो गए हे। वो ह कहिस के शासन के ए योजना के सबो मनखे मन ल लाभ उठाना चाही अइसन करके मनखे अपन पर्यावरण बर घलोक योगदान दे सकहीं। वो ह मनखे मन ले अपील करे हे के पर्यावरण ल ध्यान म रखत ग्रीन उर्जा ल बढ़ावा देवव अऊ अपन बिजली बिल के लागत खतम करे बर ए योजना के लाभ जरूर उठावव। वो ह ए योजना बर प्रधानमंत्री अऊ मुख्यमंत्री श्री विष्णु देव साय के आभार व्यक्त करे हे।