प्रधानमंत्री सूर्यघर योजना ले ओंकार साहू के घर होइस रौशन, बिजली बिल म मिलीस

राहत, कटौती के समस्या ले घलोक छुटकारा
ग्रीन एनर्जी कोति बढ़त कबीरधाम, उपभोक्ता होवत हें लाभान्वित
कवर्धा, प्रधानमंत्री सूर्यघर मुफ्त बिजली योजना कबीरधाम जिला के उपभोक्ता मन बर एक वरदान साबित होवत हे। ए योजना के तहत लाभान्वित होए कवर्धा नगर के रामनगर निवासी ओंकार साहू ह अपन अनुभव साझा करत बताइस के ये योजना वोखर बर आर्थिक अऊ घरेलू समस्या मन ले राहत के सशक्त माध्यम बने हे। वो ह बताइस के गर्मी के मौसम म हर साल बिजली के जादा खपत के चलते ओखर मासिक बिजली बिल 1500 ले 2500 रूपिया तक पहुँच जात रहिस, जेखर से आर्थिक भार झेलना परत रहिस। संगेच, सरलग अऊ लंबा समय तक बिजली कटौती ले लइका मन के पढ़ई अऊ घर के आन जरूरी काम प्रभावित होत रहिस। लेकिन प्रधानमंत्री सूर्यघर योजना के जानकारी मिलतेच वो ह तुरंत ऑनलाइन आवेदन करिस अऊ अपन मकान के छत म सोलर पैनल लगवाइस।
श्री साहू ह बताइस के वो ह 3 किलोवाट क्षमता के सोलर पैनल स्थापित कराए हे, जेकर कुल लागत 2 लाख रूपिया आए हे। ये मां केंद्र सरकार कोति ले 78 हजार रूपिया के सब्सिडी प्रदान करे गए हे, जबकि छत्तीसगढ़ शासन कोति ले 30 हजार रूपिया के अकतहा सब्सिडी जल्‍दी मिलइया हे। दुनो मिला के 1 लाख 8 हजार सब्सिडी मिल जाही।  ए सहायता ले ओ ल सोलर पैनल लगवाए म भारी आर्थिक सहयोग मिले हे। सोलर पैनल के स्थापना के बाद ले वोखर बिजली बिल म उल्लेखनीय कमी आए हे। अब ओखर बिल लगभग आधा हो गए हे, जेखर से ओ ल हर महिना स्थायी आर्थिक राहत मिलत हे। वो ह कहिस के अब पूरा परिवार ल बिजली कटौती ले घलोक मुक्ति मिल गए हे, अऊ बिजली के उपलब्धता स्थायी बने हे।
ओंकार साहू ह प्रधानमंत्री श्री नरेंद्र मोदी अऊ छत्तीसगढ़ के मुख्यमंत्री श्री विष्णुदेव साय के प्रति आभार व्यक्त करत कहिस के ये योजना न केवल आम उपभोक्ता मन ल राहत प्रदान करत हे, बल्कि पर्यावरण संरक्षण बर घलोक एक प्रभावी अऊ दूरदर्शी कदम हे।